Şah qanundu

Qanun şahdı deyirlər, yalan sözdü inanmayın. Şəxsən Xırdalan şəhərində mən qanun görmədim, mən burda şah gördüm, şahlıq gördüm. Bu şəhərdə qanun yoxdu, bu şəhərin qanunu da şahdı, şəhərin elə özü də şahdı. İndi deyəcəksiniz ki, nə olub yenə? Mən deyim siz də qulaq asın.
Xırdalan şəhərində yerləşən AAAF parkda iki binanın ortasında balaca bir yer var ki, orda sakinlər istirahət etməli, uşaqlar oynamalı və sairə, və ilaxır. Lakin bu şəhərin şahlarından biri bu ərazidə tam binanın birinci mərtəbəsini örtəcək dərəcədə mağazalar şəbəkəsi tikdirir. Maraqlı burasıdır ki, binanın sakinləri ancaq arxada danışa bilirlər, üzə çıxmağa isə heç kimin cəsarəti çatmır, yəni bu şahdan hamı çəkinir, hamı qorxur. Səbəbini isə bilmirəm. AAAF park (bu AAAF nə məna verir mən nə qədər düşünsəm də tapa bilmədim. Bu üç A hərfinin anlamı nədir, türklər demiş, yenə də anlaya bilmədim. Bir az araşdırma apardım və gördüm ki, elə böyük bir anlamı da yoxdu. Elə belə üç A hərfini yan-yana qoyub arxasına da F hərfi ilişdiriblər. Nə isə, mənim məqsədim bu adı analiz etmək deyil, mənim məqsədim bu ad sahibinin necə deyərlər qanunsuz əməlləridir.
Bu tikinti şirkətinin rəhbəri dediyim kimi yaşayış binasının önündə mağazalar şəbəkəsi tikdirir. Mağaza demək olar ki, yaşayış binasına bitişikli halda birinci mərtəbəni örtəcək qədər hündürlüyü olan bir tikilidir. Belə bir tikiliyə yer kürəsinin heç bir yerində rast gələ bilməzsən, ancaq Xırdalan şəhərində rast gələ bilərsən. Bu şəhərin rəhbərliyi və ya Şəhərsalma və memarlıq idarəsi, əlalxüsus da əlaqədar təşkilatların gözü hara baxır, bilinmir. Bu tikintiyə icazə verən şəxs və ya şəxslər gözlərini yumaraq bu tikintiyə necə razılıq veriblər, deyə bilmərəm. Yəqin gözlərini yumub razılıq veriblər. Əgər gözləri açıq olsaydı, bu tikiliyə əsla razılıq verməzdilər. Deməli gözlərini yumduracaq nəsə olub. Olsun da nə deyirik, ancaq bu sakinləri bu şəkildə qorxutmaq, onlara hədə-qorxu gəlmək isə insafdan deyildir. Sakinlər yaşadıqları binanın birinci mərtəbəsini örtən tikiliyə görə səslərini belə çıxarmağa cəsarət etmirlər. Gör bu şəhərin şahları nə qədər qəddar, zalımdırsa, heç kəs cəsarət edib bir kəlmə belə deyə bilmir.
Bəli, bu ölkədə qanun adında heç nə yoxdu, olsaydı yer kürəsində analoqu olmayan bu tikiliyə şəhər icra hakimiyyətinin başçısı, şəhərsalma və memarlıq idarəsi və daha nə bilim haraların rəhbərləri razılıq verməzdi. Demək ki, nədir, bu şəhərdə bütün qanunları pul həll edir, demək ki, nədir, bütün qanunsuz işləri pulla həll etmək olarmış.
Mənə maraqlıdır, bu özləri üçün qanun yazan şahlar bəndələrindən təbii ki, qorxmurlar, bəs Allahdan necə, ondandamı qorxmurlar. Belə Allahdan qorxmayanlardan biri barədə sizə növbəti məqaləmdə məlumat verəcəyəm.

Ardı var

Bu tikili dayandırılana qədər deyil, bu tikilinin tikintisi ləğv olana qədər durmadan yazacağam.

Zibeyir Səfərov