Haqq nazilər ancaq üzülməz

Demək olar ki, hər gün bu sözləri eşidirik: dünya dəyişib, zəmanə dönüb. Ancaq yalan sözdü nə dünya dəyişib, nə də zəmanə dəyişib. Müğənni demişkən, dünya köhnə dünyadı... Əslində mən bu adı dəyişib güclü, gücsüz dünyası qoymaq istəyərdim. Çünki indi kimin gücü kimə çatır, onu ayaqlayır, kimin gücü kimə çatır, vurub qolunu sındırır, kimin də gücü kimə çatırsa, vurub kəlləsnin qopardır. Elə AAAF parkda gedən tikinti meydançasındakı kimi. Meydança deyirəm, əslində meydança-zad deyil, iki binanın ortasında balaca bir yerdə tikilən mağazalar şəbəkəsindən söhbət gedir. 17 mərtəbəli (bəlkə də 16 mərtəbə saymamışam) binanın ortası vur-tut 20 ya da lap uzağı 30 metr olar. 16 mərtəbəli binanın sakinləri bu binanın önündə istirahət etməli, oturacaqlar qoyulmalı, uşaqlar oynamalı olan bir yerdir. Lakin hansısa bir güclü bu balaca yerdə mağazalar tikdirməyi qərara alıb. Doğrusu bu tikintinin necə tikildiyi də şübhə doğurur. Demək olar ki, mağaza binanın birinci mərtəbəsini tamamilə örtəcəkdir. Binanın birinci mərtəbəsində yaşayan sakinlərin evləri işıq üzünə həsrət qalacaqlar. Lakin maraqlısı budur ki, bu tikintiyə ehtiraz edən bir nəfər belə yoxdur. Hər kəs kiminsə qorxusundan ağzına su alıb susub. Bu qədər haqsızlığa göz yuman bu binanın sakinləri görəsən kimin qorxusundan susurlar? Bu bir günlük, beş günlük deyil ki, deyəsən ki, eybi yox, müvəqqəti çətinlikdir. Ancaq bu belə deyil axı, bu ömürlük bir dərddi, ömürlük bir çətinlikdir. Özünüz düşünün, yaşadığınız evdə günün günorta çağı elektrik yandıracaqsınız, eviniz qaranlıq zülmət olacaq və siz hər dəfə bu hadisəylə qarşılaşanda kimlərinsə yeddi arxa dönənlərini yadınıza salacaqsınız. Nə isə... uzağa getmək istəmirəm, elə bu gün yolumuzu adını çəkdiyimiz AAAF parkdan saldıq. Tikintini görəndə sözün əsl mənasında dəhşətə gəldim. Binanın tam qarşısında, kanalizasiya, elektrik və qaz xəttlərinin çəkildiyi ərazidə əməlli-başlı tikinti gedirdi. Tikinti binaın tam bir metrindən belə az olan bir yerdə tikilirdi. Fəhlələr qarışqa kimi işləyirdilər. Yəqinki təlimat belə verilib ki, iki gün içində tikinti başa çatmalıdır. Bir tərəfdən yeri qazırlar, bir tərəfdən tikinti işləri ara vermədən gedir, bir tərəfdə də yəqin buranı tikdirən adam və ya admlar burdan gələn qazancı hesablamaqla məşğuldular.
Tikinti meydançasına daxil olan kimi, bizi nəzarətçi qarşıladı. Əraziyə daxil olmağın qadağan olduğunu bildirərək bizi ordan uzaqlaşdırmağa çalışdı. Lakin bizim çıxmaq istəmədiyimizi gördükdə, əlaqədar şəxslərə müraciət etməli oldu. Lakin əlaqədar şəxslərin üzünü görmək bizə nəsib olmadı. Bu biri tərəfdən də bir nəzarətçi daxil olaraq bizi oradan uzaqlaşdırmağa çalışdı və tikintidə çəkiliş etməyin qadağan olduğunu vurğuladı. Lakin bizim israrla çəkiliş etmək istədiyimizi və sakinlərlə görüşmək istədiyimiz görəndən sonra çəkilib harasa getdi.
Üz tutduq həmin binanın birinci mərtəbəsində yaşayan sakinlərin qapısını döyməyə. Ya qapını açan olmadı, ya da bizi bu işə qarışdırmayın deyib qapını üzümüzə bağladılar. Doğrusu nə edəcəyimi bilmədim, düşünə-düşünə qaldım ki, gör nə qədər insanların gözlərini qorxudublar ki, bu boyda haqsızlığa göz yumurlar, kamera qarşısına çıxıb iki kəlmə söz deməyə kiminsə çəsarəti çatmır. Belə yerdə deyiblər də, gözünün odunu alıblar.
Ordan-burdan əldə etdiyimiz məlumata görə bu tikilinin sahibi, sahibkarı və ya icra edənlərindən biri Camal bəy və Şaiq bəydir. Bunların kim olduqlarını da dəqiq deyən olmadı, hansı işə, hansı məssəbə qulluq etdiklərini də öyrənə bilmədik. Maraqlıdır, görəsən bu tikintiyə kim və ya kimlər icazə veriblər? Belə haqsızlıq dünyanın heç bir yerində yoxdur və ola da bilməz. Abşeron rayon İcra hakimiyyətinin başçısı və eyni zamanda əlaqədar təşkilatlar hara və ya kimin cibinə baxırlar? Belə haqsızlıq olan yerdə insanın ürəyindən tək bir şey keçir. Görəsən bu dünyada hegemonluq edənlər, bu dünyanın bəndələrindən qorxmayanlar göydə Allahdandamı qorxmurlar. Belə Allahdan qorxmayanların sayəsində bu dünya baş-ayaq olub. Mən inanıram ki, əlaqədar təşkilatlar bu barədə ölçü götürəcək və qısa müddət ərzində bu tikinti nəinki dayandırılacaq, hatta tikintiyə son qoyulacaqdır.

Zibeyir Səfərov
Qarşı tərəfin də fikirlərini bilmək istəyərdik.