TƏBRİK EDİRƏM!

Bu gün Sumqayıt şəhərinin canlı ensiklopediyası və eyni zamanda Sumqayıtın Fəxri vətəndaşı adına çoxdan layiq olmuş Bəxşeyiş Ələmşahovun həyatının 65-ci baharı tamam olur və 66-cı baharına ayaq qoyur. Bu münasibətlə hər zaman hörmətini saxladığım, ziyalılığı, mədəniyyəti, səmimiyyəti qarşısında baş əydiyim yubilyarı təbrik edir, ona uzun ömür, can sağlığı arzulayıram. Hər zaman arzuladığı və bu gün də ürəyinin ən dərin guşəsində bir sirr kimi saxladığı Qərbi Azərbaycan torpağına qayıtmağını cani könüldən arzulayıram. Arzu edirəm ki, 1988-ci ildə öz doğma dədə-baba diyarından qoparıb gətirdiyi və bu gün də göz bəbəyimi kimi qoruduğu min illərin yadigarı olan eksponatları yenidən dədə-baba torpağına qaytarmağın xoşbəxtliyini yaşasın. Hər zaman aid olduğu yerlərə bir gün gələcək qayıdacaq deyərək Sumqayıt tarix muzeyində də bu gün qorunub saxlanan eksponatları yenidən Qərbi Azərbaycana qaytarmaq və orada saxlamaq nəsibi olsun.
Bəxşeyiş Ələmşahov mənim üçün kimdir? Əgər bir gün mənə bu sualla müraciət edən olsaydı, mən o zaman ürəklə deyərdim ki, mənim müəllimim. Geniş ürəkli, incə ruhlu, mübariz, axtarışlarla zəngin olan bir ömrün yaradıcısı. Əslində, bu və digər keyfiyyətləri özündə birləşdirən insanlar varlıqlarının yaradıcılarıdır deyirlər. Daxilindəki bacarıq və qabiliyyəti üzə çıxarıb, ağlın diqtəsi və məntiqlə hərəkət etmək cəmiyyətdə öz yaradıcına çevrilmək deməkdir. Səmimi etiraf edək ki, Bəxşeyiş Ələmşahov da yaradıcılığa gəldiyi zamandan özündə olan daxili keyfiyyətləri üzə çıxarmaqla mənəvi portretinin müəllifidir.
65 il, 65 bahar, 65 xəzan, 65 qış yaşamış bir ömrün- zaman məsafəsindən boylanan illəridir bu onilliklər. Bu illəri arxada qoyub,¬ ömrün müdrikliyinə qədəm qoyan Bəxşeyiş müəllimin haqq-hesab verməyə tərcümeyi-halında dəyərli məqamlar var. Bu, onun yaradıcılıq bioqrafiyasının əsasında duran dəlillərdir.
Ömür biblioqrafiyasının ilk səhifələrindən oxuyuruq. Bəxşeyiş müəllim Qərbi Azərbaycan dediyimiz o qədim diyarda dünyaya gəlib. 1988-ci ildə dədə-baba torpağı olan Qafan şəhərindən köç edərək Sumqayıt şəhərinə pənah gətirib. Əmək fəaliyyətinə Qafan şəhərində başlasa da, Sumqayıt İcra Hakimiyyətində davam etdirmişdir. Hazırda isə Sumqayıt şəhərində ən öndə olan məktəblərdən biri olan 39 saylı tam orta məktəbin direktorudur. Məktəbə daxil olarkən elə foyedəcə səni elə bir rəsm qarşılayır ki, bu rəsmin hətta bənzərini belə yer kürəsini gəzsən də tapa bilməzsən. Mən hər dəfə o məktəbə ayağımı qoyanda bu böyük portretin qarşısında bir anlıq ayaq saxlayır, sonra direktorun otağına yaxınlaşıram. Yeri gəlmişkən onu da deyim ki, Qərbi Zəngəzurdan olan vətənpərvər ziyalımız Bəxşeyiş Ələmşahovun 1988-ci il deportasiyası zamanı erməni tapdağından xilas edib özü ilə gətirdiyi və Sumqayıt muzeyinə hədiyyə etdiyi eksponatlarla da son dərəcə çoxdur və həmin eksponatlar tarix muzeyində qorunub saxlanılır.
Bəxşeyiş müəllim söhbət etmək çox asandır. Onunla istədiyin mövzuda sphbət edə bilərsən. Bəxşeyiş müəllim deyir ki, 44 günlük müharibə zamanı Azərbaycan haqq savaşında qalib oldu. 30 il davam edən müharibə 1988-ci ildə başlasa da, əslində mənfur düşmənlərimizlə bizim davamızın kökü daha qədimlərə dayanır. Belə ki, 1988-ci ildə Zəngəzur ərazisindən, Qafandan, Mehridən, Sisiandan, Gorusdan azərbaycanlıları kütləvi şəkildə qovmağa başladılar. Həmin vaxta qədər Zəngəzur yolu ilə gediş-gəlişimiz var idi. Amma səfərlər tam sakit, stabil olmurdu. Ermənilər özlərinin xain niyyətlərini, türkləri sevməməklərini həmişə büruzə verirdilər. O zaman Naxçıvan qatarı Mincivana gəlirdi. Mincivan böyük dəmiryol stansiyası sayılırdı. Orada iki qatar yolu ayrılırdı, biri Qafana, digəri Naxçıvana gedirdi. Ermənistanda yaşayan azərbaycanlılar Mincivana qədər rahat hərəkət edirdilər. İnsanlar düşünürdülər ki, Mehri rayonunun stansiyasında düşmək lazım deyil. Çünki ermənilər Naxçıvan qatarı Mehri stansiyasına çatanda həmişə orada dava salırdılar. Ermənilər həm də qorxaq millətdir. Davanı da azərbaycanlıları sevmədiklərindən, özlərinə təhlükə olaraq gördüklərindən ötrü salırdılar. Yəni deməyim odur ki, kökü əsrlərə dayanan davanın qığılcımları 1988-ci ildə alovlanmağa başladı. Mənfur düşmənlərimiz təkcə Qərbi Azərbaycana sahib olmaqla yetinmədilər, eyni zamanda Azərbaycana məxsus ərazilərə də sahib çıxdılar. Şükürlər olsun ki, bu gün onların əsarətində olan torpaqlarımız öz əsl sahiblərinə qaytarıldı. Bu sevinci bizə yaşadan ordumuza, başda Ali Baş Komandanımıza dərin təşəkkür və minnətdarlığımı bildirirəm.
Bəxşeyiş müəllim uzun illər Sumqayıt Şəhər İcra Hakimiyyətində işləyib. Kimliyindən və istəyindən asılı olmayaraq Bəxşeyiş müəllim vicdanla və məsuliyyətlə insanların istəklərini yerinə yetirməyə çalışmışdır. Elə bunun nəticəsidir ki, bu gün Sumqayıt küçələrində Bəxşeyiş müəllimlə rastlaşan hər bir kəs hörmət əlaməti olaraq onun qarşısında baş əyir. Təbii ki, bu sevgini Bəxşeyiş müəllim özü qazanmışdır. Onu da deyim ki, Bəxşeyiş müəllim həmişə cavan yaradıcı insanlara köməklik eləyib. Onlara arxa-dayaq olub. Onların inkişafı üçün əlindən gələni etməyə çalışıb. Uzun illər həyatını Azərbaycan dövlətinə, dövlətçiliyinə sərf eləyən, bu mövzularda çoxlu maraqlı yazılar yazan, Qarabağ müharibəsinə həsr elədiyi yazılarında ermənilərin işğalçılıq siyasətini dünya mətbuatına çıxaran və saytlar vasitəsi ilə dünya xalqlarına çatdıran Bəxşeyiş Ələmşahovu 65 illik yubileyi münasibəti ilə bir daha təbrik edib, ona həyatda can sağlığı və yaradıcılıqda yeni-yeni uğurlar arzu edirik. Və hamının adından deyirik: “65 yaşınız mübarək”!

Mahir Hümbətov,
yeniazerbaycanheyati.com informasiya portalının rəhbəri

Diqqət!
Saytın materiallarından istifadə etmək üçün hyperlinklə istinad etməyiniz xahiş olunur!

Tarix: 18-08-2022, 14:42 Oxunub: 339

Bölməyə aid digər xəbərlər

30-05-2022, 17:30 Sumqayıtın qonaqları

8-05-2022, 12:45 Sumqayıt doğma şəhərimizdir

7-05-2022, 18:33 Sumqayıtn fıxri vətəndaşı

6-03-2022, 10:15 Sumqayıt doğma şəhərimizdir

23-02-2022, 10:24 İlham Əliyev və Vladimir Putinin birgə mətbuat konfransı TAM MƏTN + VİDEO

4-12-2021, 08:32 QARABAĞ AZƏRBAYCANDIR!

24-08-2021, 17:30 Yaralı yerimiz qəbiristanlıq

19-08-2021, 11:30 Təbrik edirəm!

19-08-2020, 11:51 TƏBRİK EDİRƏM!

20-06-2021, 10:30 SON İLLƏR SUMQAYIT NECƏ İNKİŞAF ETDİ? - FAKTLAR