ÖMRÜNÜ VƏTƏNƏ FƏDA EDƏN ŞƏHİDLƏRİMİZ

Azərbaycan Respublikası Müdafiə Nazirliyinin nəzdində yerləşən Həzi Aslanov adına "Ordu İdeoloji və Mədəniyyət Mərkəzi" Zabitlər Evində "Şəhidlər ölməz, Vətən bölünməz" adlı silsilə tədbirlər keçirilir. Belə tədbirlərdən biri də Ay Media Company təsisçi direktoru Almaz Yaşar tərəfindən şəhidlərimizin xatirələrini yad etmək məqsədi ilə keçirildi. Belə ki, şəhidlərimizdən Müdafiə Nazirliyinin Kəşfiyyat İdarəsinin Baş Zabiti Mayor Kərimov Taleh Adil oğlunun, Mayor Tabor Komandiri Rahib Bəxtiyar oğlu Babayevin və Kapitan Heydərov Anar Bəhruz oğlunun xatirəsi anıldı. Tədbirdə şəhid ailələri, şəhid xanımları, şəhid övladları, şəhidlərin döyüş yoldaşları, qazilər, KİV nümayəndələri, Sumqayıt şəhəri şəhid anaları, "Dəmir yumruq" AlfaA cəmiyyətinin sədri Ülviyyə xanım Əsədova, Qanun yolu.info.az saytının rəhbəri Arif Süleymanlı, Murov qartalı şəhid Fəxri Qəribzadənin anası Mehparə xanım, "AY MEDİA COMPANY"-in əməkdaşı Süsən Hüseynova və fəxri qonaqlar iştirak edirdilər.
Tədbiri giriş sözü ilə açan tədbirin təşkilatçısı və aparıcısı Ay Media Company təsisçi direktoru Almaz Yaşar qonaqları və şəhid ailələrini salamlayaraq dedi:
- 27 sentyabr 2020-ci ildə Azərbaycan xalqı, dövləti və ordusu elə bir tarix yazdı ki, bu, bütöv bir millətin ləyaqət rəmzinə, milli qeyrət nümunəsinə çevrildi. Biz yağı düşmənin üstümüzə atdığı ləkəni təmizlədik, biz qamətimizi düzəltdik, biz 30 ildir itirdiyimiz dəyərləri özümüzə qaytardıq, biz illərlə həsrətində olduğumuz torpaqlarımıza qovuşduq. Biz heç nəyi unutmadıq, unutmadıqca da möhkəmləndik, gücləndik və nəhayət, dünyanın illərdir göz yumduğu ədalətsizliyi özümüz təkbaşına aradan qaldırdıq. Prezident, Müzəffər Ali Baş Komandan İlham Əliyevin ətrafında sıx birləşən Azərbaycan xalqı 30 illik mərhumiyyətə cəmi 44 günə son qoydu. Tariximizdə yeni səhifə yazıldı. Vətən müharibəsi Azərbaycan xalqının Zəfər məramına, milli kimlik mücadiləsinə, torpaq və Vətən sevgisinə şahidlik etdi.
Tarixi torpaqlarımızı 30 ildir işğal altında saxlayan Ermənistanın hərbi təxribatları müntəzəm xarakter alanda Azərbaycan cavab vermək məcburiyyətində qaldı. Şanlı aprel döyüşlərindən sonra dərs almayan Ermənistan rəhbərliyi ötən ilin iyul və avqust aylarında yenidən hərbi təxribatlara əl atanda yəqin düşünürmüş ki, bu, onlara itirilmiş ictimai nüfuzu qaytaracaq və yaxud Azərbaycan üzərində kiçik qalibiyyət belə onlara erməni cəmiyyətində lovğalanmaq üçün bir xeyli vaxt qazandıracaq. Amma bu dəfə onların fikirləşdiyi kimi olmadı, Vətən müharibəsi Ermənistanın bütün mənfur planlarını alt-üst etdi, 27 sentyabr tarixi onların dırnaqarası arzularının tükənən günü oldu. Azərbaycan xalqı öz Prezidentinin ətrafında sıx birləşməklə bütün dünyaya sübut etdi ki, Qarabağ millətimizin milli ləyaqət rəmzidi və Azərbaycan xalqı 30 ildə bir an da olsun Qarabağ arzusundan bir addım geri çəkilməyib. Prezident İlham Əliyevin həyata keçirdiyi millət quruculuğu prosesi ona gətirib çıxardı ki, Xalq-Prezident-Ordu birliyi qalib gəldi, düşmən 30 ildir işğal altında saxladığı torpaqlarımızdan qovuldu. Təbii ki, bu qələbədə itkilərimiz də oldu. Şəhidlik zirvəsinə yüksələn igidlərimiz tarixin səhifələrinə adlarını qızıl hərflərlə yazdılar. Bu gün belə adını tarixin səhifəsinə yazdıran şəhidlərimizin anım gününə toplaşmışıq. Allah bütün şəhidlərimizə rəhmət eyləsin, məkanları cənnət olsun. Biz onları sayəsində qələbə sevincini yaşadıq və Azərbaycan xalqı yaşadıqca şəhidlərimiz də xatirələrdə, ürəklərdə yaşayacaqlar.
Sonra Taleh Kərimovun həyat yoldaşı Nəzakət xanım çıxış edərək Talehin necə mərd, necə vətən, torpaq sevən bir igid olduğundan danışdı. Uzun illər hərbidə çalışdığından, hərbi geyiminə və bayrağımıza necə vurğunluğundan söz açdı. Şəhid xanım onu da qeyd etdi ki, Taleh həddindən artıq vətənə vurğun bir insan idi. Səmimiyyəti, mədəniyyəti ilə hər kəsin qəlbində taxt qurmuşdu. Onun yoxluğu həyatımızın hər anında görünür, Talehin yeri elə bilirəm ki, heç bir zaman dolan deyil. Taleh kimi oğullar dünyaya yüz ildən bir dəfə gəlirlər.
Sonra döyüş yoldaşı gizir Sərxan Abbasalıyev çıxış edərək dedi:
-Vətən sevgisi hər oğulda olmur. Vətəni canı qədər sevənlər şəhidlik zirvəsinə ucaldılar. Onların qəhrəmanlığı barədə çox danışmaq olar. Dövlətimizin qətiyyəti, ordumuzun gücü, xalqımızın misilsiz dəstəyi sayəsində əldə olunan bu möhtəşəm qələbə, əlbəttə ki, tariximizin şanlı zəfəri kimi gələcək nəsillərin xatirəsində əbədi yaşayacaq. Vətən müharibəsində xalqımız tarixində olmadığı dərəcədə yüksək birlik, həmrəylik nümayiş etdirdi, vahid amal uğrunda birləşdi. Ay yarım davam edən bu savaş xalq-iqtidar birliyindən güc alan Azərbaycanın qüdrətinin, milli birliyinin sarsılmazlığının göstəricisi oldu. Eyni zamanda Azərbaycan xalqının qazandığı zəfərin möhtəşəmliyi ölkə başçısı İlham Əliyevin mümkünsüzü mümkünə çevirmək qüdrətindən bəhrələndi. Böyük qələbə son əsrlərin ən böyük torpaq qazancı, münaqişənin birdəfəlik bitməsi, Qarabağla yanaşı, Naxçıvanın Vətənimizin Şərq torpaqlarına birləşməsi, dünya Azərbaycanlılarının yumruq kimi bir olması ilə tarixə yazıldı. 28 il yarım işğal altında qalan Şuşanın işğaldan azad olunması, ulu öndər Heydər Əliyevin “Azərbaycan üzükdür, Şuşa onun qaşı” sözləri yenidən öz dəyərinə qovuşdu. Qətiyyətli Azərbaycan Ordusunun gücü, qüdrəti ilə bu qədim şəhər öz sahiblərinə qaytarıldı. Dövlət başçımızın qeyd etdiyi kimi, Şuşada yenə də azan səsi eşidiləcəkdir. Sənətkarlar beşiyi olan bu qədim şəhərdə artıq Azərbaycan bayrağı dalğalanır. Bu təbii ki, qəhrəman ordumuzun sayəsində baş tutdu. Allah şəhidlərimizə rəhmət eyləsin, məzarları nurla dolsun.
Şəhid Rahib Babayevin hərbiçi dostlarından Qaşqay Davudov, gizir Sərxan Abasquliyev də çıxış edərək hərbiçilərimizin ömür yolundan söhbət açdılar. Şəhidin qaynatası İntiqam Quliyev də Rahib barəsində ürək yanğısı ilə danışdı.
Kəşfiyyat Baş İdarəsinin əməkdaşları Dadaşov Elvin Kamil oğlu və Şirəliyev Əsgər Həzran oğlu da anım tədbirində iştirak edirdilər. Onlar da çıxışlarında şəhidlərimizin keçdikləri şərəfli ömür yolundan, qəhrəmanlıq salnamələrindən ağız dolusu danışdılar.
Şəhid Anar Heydərovun yaxınları da öz ürək sözlərinin dilə gətirdilər. Məmmədli Fərid, Məmmədov Hikmət, Həyat yoldaşı Zərifə xanım çıxış etdilər. Zərifə xanım çıxış edərək qonaqları salamlayıb tədbirin təşkilatçılarına dərin təşəkkür və minnətdarlığını bildirdi. Onu da qeyd etdi ki, həyat yoldaşı Anar vətəninə bağlı bir hərbiçi idi. O, uzun illərdi ki, hərbidə çalışırdı. Vətənin hər qarışı onun üçün əziz və doğma idi. Canı qədər sevdiyi vətən torpağına canını qurban etdi. Onun arzuları çox idi. Ən böyük arzusu isə vətən torpağını azad görmək idi. Şükürlər olsun ki, bu gün vətən torpağı azaddır.
Tədbirdə qonaqlarla yanaşı şəhidlərin dostları, hərbiçilər, qazilər də öz ürək sözlərini dilə gətirdilər. Səma adlı körpə balamız şəhidlərimizə həsr olunmuş şeir parçası ilə qonaqlarımızı kövrəltdi. Zabitlər evinin müğınniləri də öz mahnı töhfələrini qonaqlarımıza təqdim etdilər.
Tədbirin sonunda "AY MEDİA COMPANY" təsisçi direktoru Almaz Yaşar tərəfindən şəhid ailələrinə Təşəkkürnamə təqdim edildi və xatirə şəkilləri çəkildi.

Süsən Hüseynova,
"AY MEDİA COMPANY"-in əməkdaşı