10 NOYABR. Bu tarix əbədiyyətə qədər yaddaşlara, tarixə qızıl hərflərlə yazıldı. Həmin gün tarix yazan, Qarabağı 44 gün içərisində işğaldan azad edən, dövlət rəhbərimiz cənab İlham Heydər oğlu Əliyev QARABAĞIN İŞĞALDAN azad edildiyini böyük sevinc içərisində vurğuladı. On milyon Azərbaycan xalqı sevinc göz yaşlarını tuta bilmədi, şəhid anaları ağladı, şəhid ataları ağladı, şəhid bacıları, qardaşları və ümumiyyətlə hər kəs sevincdən ağladı. Çünki həmin gün Şəhidlərimizin qısası alınmışdı. Bəli, bu gün biz Azərbaycanın ən qürurlu günlərini yaşayırıq. Həmişə deyərdik ki, əgər müharibə başlasa, qısa müddətdə bu problemi həll edəcəyik, düşməni darmadağın edəcəyik. Elə də oldu. Cəmi 44 gün bəs elədi ki, biz düşməni məğlub etdik və haqq öz yerini tapdı.
Bəli, müharibə qurbansız olmur. Gənc əsgərlərimiz fədakarlıq, rəşadət göstərərək doğma torpaqları uğrunda şəhid oldular. Bu, böyük faciədir, xalqımız üçün, onların yaxınları üçün, valideynləri üçün böyük faciədir. İstər mülki vətəndaş olsun, istər hərbçi olsun, fərq etməz, onların hamısı soydaşlarımızdır, övladlarımızdır, qardaşlarımızdır; Biz Şəhidlərimizin qanı, canı bahasına bu qələbəni yaşadıq. Torpaq üçün, vətən üçün canını qurban verənlərdən biri də Leytenant Məhərrəmov Ülvü Tahir Oğlu idi. O, 05.07.1997 ildə Bakı şəhərində anadan olmuşdur, əslən Qubadli rayonu Sarıyataq kəndindən idi. Uşaq yaşlarından vətənpərvər bayrağa sevgisi böyük olduğu üçün, iki yaşında hər səhər bağçaya gedərkən yolda Azərbaycanın himnin oxuyarmış. 5 yaşından atasına deyərdi ki, Qubadlının da, əmimin də qanını mən alacam. Əmisi Məhərrəmov Mirzə 1993-cü ildə Qarabağ müharibəsində şəhid olmuşdur.
Ülvi 2003-cü ildə 1-ci sinifə getmiş, 9-cu sinifi bitirəndən sonra isə Naxçıvanski adına hərbi lisseyə qəbul olmuşdur. Ali təhsilini Azərbaycan Ali Hərbi Məktəbdə almışdır. Xasiyyətcə ciddi, əsl hərbiçi xarakterinə malik olan Ülvinin Vətəninə, bayrağına sevgisi böyük idi. Ona görə də bu yolda ürəklə addımlayırdı. AAHM bitirdikdən sonra Leytinant rütbəsin alıb Beyləqan rayon N-saylı hərbi hissədə təyinatı üzrə işə başlayır. İşinə bağlı əsgərlərinin qayğısına qalan komandir kimi fərqlənirdi.
Hərbidə fərqləndiyinə görə 2 ay sonra Mayis Bərxudarov tərəfindən fəxri fərmanla təltif olunmuş, qısa zaman ərzində Bölük kamandiri vəzifəsinə qədər yüksəlmişdir.
Ülvi bir il idi ki, hərbidə işləyirdi. Bu vaxt II Qarabağ müharibəsi başlayır. Ülvi tərəddüd etmədən ön cəbhədə döyüşə yollanır. Bir neçə rayonun alınmasında qəhrəmancasına iştirak edir. Fizuli rayon istiqamətindəki ağır döyüşlərin birində öz yaralı əsgərini xilas etmək istəyib. Ona "getmə tək uşaqsan sənə bir şey olar" desələr də, 0 "bura döyüşməyə ölməyə gəlmişik" deyib və əsgərini xilas etməyə getmiş və orda qəhrəmancasına şəhid olmuşdur. Subay idi. Allah rəhmət eləsin!
Bəli, Bu Qələbəni bizə qazandıranlar var! Biz onları; Qələbə dadını bizlərə daddırmaq üçün canlarından keçmiş şəhidlərimizi, qazilərimizi heç vaxt unutmamalıyıq, unutmayacağıq! Onların qəhrəmanlıqları haqqında kitablar çap edilməli, tarix dərsliklərinə salınmalı, şagirdlərimiz tərəfindən öyrənilməli, qəhrəmanlıq dastanlarını yazmalı, filmlər çəkilməli, barələrində bəstələnmiş nəğmələri dildən-dilə gəzdirməliyik! Qazilər bizim üçün canlarını fəda etməkdən zərrə qədər belə çəkinməyibsə və Şəhidlər öz canlarını qurban veribsə, biz onlara ömrümüz boyu borcluyuq! Baxmayaraq ki, biz nə etsək də, onlara olan borcumuzu ödəyə bilmərik, yenə də bu yolda sona qədər çalışmalıyıq! Şəhidlərimizin ruhu, qazilərimizin sızıldayan canı rahatlıq tapsın deyə bunu etməliyik! Bir də “Ölüm sevinməsin qoy” çünki ölüm qalib gəlmədi, ölümsüzlük qalib gəldi. Ruhunuz şad olsun Məkanınız cənnət.