Rübailər

Yanıram, vəslinə əl yetmir neynim,
Dərd üzür canımı, qəhr etmir,neynim,
Səni əllərimlə əkdim torpağa
Torpaq əkdiyimi göyərtmir, neynim.

* * *
Yollarım kəsəkli, bəxtim qara daş,
Bir gözüm nəşəli, bir gözümdə yaş.
Ürəyim ney çalır, əllərim çapan
Adıma sərsəri deməyin, qardaş.
* * *
Dünya qəm selində batırar məni
Çaldığı havaya yatırar məni.
Bir ömür yormuşam qovhaqov ilə
Çətin ki, əlliyə çatdırar məni.
* * *
Yol aldım bilmədim hayana getdim,
Nə asta, nə iti, miyana getdim.
Səfərə çıxmışdım qazanc adıyla
Ömrümü xərcləyib ziyana getdim.

***

ACI SÖZ

Qapım dost qapısı, odam el evi
Niyyətin bəd isə qapımı döymə,
Bir qarış yol gedir dildən ürəyə
Dilinə sahib ol, ürəyə dəymə.

Ömür yollarında darılma, çaşma,
Bu yolda irəli-geri var, qardaş
Demirəm kilid vur dilinə, dinmə
Sözü də deməyin yeri var, qardaş.

Getməz söz yarası yüz məlhəm ola,
Sözünə sığal çək, qanmazı qandır,
Dünyanın özü də sözdən yaranıb
Sözlə hər könüldə bir çıraq yandır.

Nəyimiz qalacaq addan savayı
Ağayla nökərin sonu ki, birdi,
Ürəyim bir haqsız sözdən qırılıb
O kəlmə yıxılıb öldüyüm yerdi.

***

QARADAMI

Hamıdan tez gəldi Əli
Kiçik, yaşıl vedrə ilə.
Arif, gəl,
Ayaz gəl.
Nadiri də ordan səslə,
Sən kök gətir,
Sən süpürgə...
Qaradamı düzəltdilər,
İki nəhəng qar topundan.
Oxudular, oynadılar,
Xoşhal oldu hər kəs bundan.
Səhər baxıb güldü Günəş,
Bütün aləm döndü selə.
Qar babadan axşam yerdə,
Tək süpürgə, yaşıl papaq,
Bir də burun qaldı elə.

***

Sayman Aruzla ilk görüşdə diqqətimi onun qıvrım saçları və içində sila həsrəti oyalanan ağıllı, dərin və yaraşıqlı gözləri çəkdi. Bu gözlər sanki:"Azərbaycanı bütöv görməsəm dünyanı gözüaçıq tərk edəcəyəm"deyirdi hər kəsə.

VƏTƏN HARAYI

Bir ucun Ərdəbil, bir ucun Dərbənd
Sənə Vətən deyib basdım bağrıma,
Öpüb bayrağını gündə min kərə
Bükdüm özün boyda bitməz ağrıma.

Perik düşdü ağır-ağır ellərin
Ağlamağa ana gərək bu dərdi.
Kəlbəcərin, Xocalının, Şuşanın
Halın görən elə ölmüş qədərdi.

Vətəndən Vətənə gedən köçə bax...
Özünə sığmırdı Qubadlı, Laçın
Əl boyda çadıra sığdı, ilahi,
Hardasan, ay Nəbi, gorun çatlasın.

Sinən üstdə zülüm-zülüm dağın var-
Gen qucağın zaman-zaman boşaldı,
Yastığımız yüngül oldu-yubandıq
Görkün olsun göz dağlayan Daşaltı.

Gözümə ağ saldı acı qismətin-
Dözdükcə alışdı bu sinəm, Vətən,
Sənin də ayağın-qolun kəsildi
Sən mənə dərd oldun, mən sənə, Vətən!

Tarix: 19-01-2023, 08:00 Oxunub: 77

Bölməyə aid digər xəbərlər

24-08-2021, 17:30 Yaralı yerimiz qəbiristanlıq

9-07-2021, 21:14 Allah rəhmət eyləsin

4-07-2021, 10:30 ŞAİRİN YENİ ŞEİRLƏRİ

4-07-2021, 10:00 Şair Aqşin Dadaşoğlu

20-06-2021, 10:30 SON İLLƏR SUMQAYIT NECƏ İNKİŞAF ETDİ? - FAKTLAR

29-05-2021, 20:00 Allah rəhmət eyləsin

21-05-2021, 07:58 İki oğlu şəhid olan ana: “Ən böyük arzuları düşməndən qisas almaq idi” – FOTOLAR

16-05-2021, 16:00 Şeirlər

13-05-2021, 12:18 LAÇINSIZ DÜNYANI NEYNİRƏM AXI?!

8-03-2021, 17:31 Sumqayıt polisinin yeni rəisini yaxından tanıyaq...