Şair Aqşin Dadaşoğlu

Dəniz gözlüm, bilirsənmi, yağışlar,
Ləpələri döyər, keçər xəbərsiz.
Gülüşünün ən sevimli yerindən
Qağayılar ötər, keçər xəbərsiz

Bədii təsvir və ifadə vasitələrindən məharətlə istifadə edən, şeirlərində oxucuya aşıladığı fikri qüvvətli formada çatdıran, əsərlərində fəlsəfi, didaktik məqamların duyulduğu, müasir Azərbaycan ədəbiyyatının istedadlı nümayəndələrindən biri də Aqşin Dadaşoğludur. O 1969-cu il 1 iyul tarixində Xaçmazda dünyaya gəlmişdir. Yaradıcılığa gənc yaşlarından başlayan şair bir çox mövzuda əsərlərini qələmə almış dövrü mətbuatda çap olunmuş və ədəbi mühitdə tanınmışdır.
Aqşin Dadaşoğlu şeiriyyatında məhəbbət mövzusu özünəməxsus yer tutur. Şair 80-cilər nəslinə aid olsa da, əsərlərində modernizm ruhu sezilir. Sevgi mövzulu əsərlərində nakam məhəbbətin, kədərin duyulduğu kimi, həm də qovuşmaq arzusunun mövcud olduğu da qeyd olunur. Məsələn, görkəmli yazarın “Mənə yoxsan demə” şeirində biz kədər görə biliriksə, ümid də görə bilirik. Əsərin müəyyən misralarına nəzər yetirək:

Bir az ayağımı şeh isladıbdı,
Ucuz köynəyimi cırıbdı kollar.

Meşədə, dənizdə, bulaq başında,
Dağın zirvəsində görünərəm mən.
Uçuram, çapıram, üzürəm belə,
Xəyaldan yıxılsam sürünərəm mən.

Mənə yoxsan demə,
Mən hələ varam,
Hələ xırdalanıb qurtarmamışam.

Bu gözəl şeir nümunəsində sevgiyə müxtəlif prizmalardan yanaşılmışdır. Bu da xarizmatik şairin nə qədər istedadlı olduğunu və oxucunun da böyük məhəbbətlə mütaliə etdiyinin göstəricisidir.
Digər mövzulara nəzər yetirsək, heç şübhəsiz ki, vətən-şəhid mövzusu ən ön sıralarda durar. 1991-1993-cü illər Azərbaycan torpaqlarının işğal altına düşməsi gənc şairi dərin kədərə bürümüşdü. Onun 90-cı illərdə yazdığı vətən şeirlərində ictimai iztirab duyulurdu, lakin müzəffər Azərbaycan ordusunun layiqli qələbəsi ilə əldə olunan zəfər şairin yaradıcılığında nikbin ruhları artırdı, amma torpaqların uğrunda şəhid olan şəxslər yenə də Aqşin Dadaşoğlu yaradıcılığında dərin fəlsəfi hüznlə yad edildi. Bu şeirlərə nəzər salaq:

Nə var boş qalan qucaqda?
Xatirəsi hər bucaqda,
Vətən adlı bir ocaqda,
Yanmaqdı, qovrulmaqdı bu.

*

Şəhidlər namusdur, qeyrətdir, dindir,
Şəhidlər Allahın ər balasıdır.
Harda şəhid varsa, ora vətəndir,
Yurdum Kərbəlalar Kərbəlasıdır.

Bu nümunələrdə istər xalq şeiri üslubu, istərsə də müasir ruh duyulur, həmçinin mükəmməl təşbeh və hər kəsin ürəyinə toxunan misraları görürük.
Aqşin Dadaşoğlu yaradıcılığınının mühüm bir hissəsini də tənqidi şeirlər tutur. Onun bu şeirləri ictimai fikir səviyyəsində özünəməxsus yer saxlayır. Şairin bu tip əsərlərində həm dini mövhumatın geriliyi, həm də insanları narahat edən məsələlər müzakirə edilmişdir.

Nəzir qutusuna girir qəpiklər,
Nəzir qutusundan villalar çıxır.

*

Kimin ilməsi var bəs bu düyündə?
Yenə xəlifəlik Əlinin deyil?
Başı kəsilən də, başı kəsən də
“Ya Allah”, “Ya Allah”, “Ya Allah” deyir.

2019-cu ilin sonlarında yaranan, 2020-ci ildən isə kütləvi hal alan koronavirus amilinə də şairin əsərlərində rast gəlinir. Söz incisi Aqşin Dadaşoğlu bu barədə yazır:

Başı batsın koronanın, vaksinin,
İldə bir yol toyxanada süzərdik.

Bu misralardan da göründüyü kimi bir neçə ölkədə heç bir əks təsir göstərməsə belə dünyanı cənginə almış koronavirus haqqında şairin əsərlərində bu haqda yer verilmişdir və tamamilə bütün xalqın arzusunda olduğu əvvəlki adət-ənənələrə qayıtmaq arzu edilir.
Bildiyimiz kimi Azərbaycanın gözəl guşələrindən biri də Xaçmaz şəhəridir. Şairin böyüyüb başa çatdığı bu əziz torpaqlar, kənd və əsrarəngiz mənzərələr güclü qələm sahibinin şeirlərində özünü yüksək səviyyədə göstərir. Belə ki, müəllif uşaqlıq çağları və kənd həyatı ilə bağlı olaraq deyir:

Çubuq atı külək kimi çapardım,
Gah xəzriyəm, gilavaram deyərdim.
Babam məni haraylardı uzaqdan,
“Gələvaram”, “Gələvaram” deyərdim.

*

Fındıq ağacına sığal da çəkdim,
Öpdüm yanağından çiyələklərin.
Şehli torpağımda bir çiçək əkdim,
Bu gün qonağıyam kəpənəklərin.

Görkəmli şair dərd haqqında yazdığı şeirlərlə, həm də ədəbiyyatımızda dərdə yeni bir obraz verdi.

Keç içəri təzə dərdim,
Qapıda gözləmə belə.

Gəl qonaq ol, gündə yüz yol,
Kandarımda məni yorma.
Hər hansı dərd olursan ol,
Təkcə vətən dərdi olma.

Son iki misra isə şeirin möhtəşəmliyini, şairin də dahiliyini üzə çıxaran ən mükəmməl səbəblərdən biridir.

Məqalənin müəllifi – Yazar Elşən Təhməzov

ŞAİRİN YENİ ŞEİRLƏRİ BARƏDƏ....