ŞAİRİN YENİ ŞEİRLƏRİ

"Mən səni sevməkdən heç yorulmadım"

Mən səni sevməkdən heç yorulmadım,
Sən isə sevmədin, bezməmisənmi?
Bizim sevgimizi əbədi sandım,
Yanıldım, üzümdən sezməmisənmi?

Qəlbim paramparça, dözmürəm dərdə,
Mən necə sarıyım bu qırıqları?
Göyəmi qeyb oldun, izin yox yerdə,
Məcbur yaşayıram ayrılıqları.

Sən mənim qədrimi bilmədin heyif,
Əğyara meyl etdin, gözlərim dolur.
Alnıma yazıydın, şeirimə rədif,
İndi yazdıqlarım saralıb, solur.

Arzuma yetmədim, qəm məni boğdu,
Həqiqət yox imiş sənin sözündə.
Səni anlayan gün, günəşim doğdu,
Hiylə, kələk varmış baxan gözündə.

"Ayrılıq"

Əzablar çoxalır sevəndə insan,
Ömür zəhərlidir, həyat zülmdür.
Deyirlər: "Ayrılıq ölüm deyil ki",
Ayrılıq - ölümdən betər ölümdür.

Nə yatmaq, nə yemək, nə gəzmək olur,
Yatdığın yuxuda ümid arzusu.
Yediyin yemək də keçmir boğazdan,
Gözlərin hər yerdə gəzir o qızı.

Fikirlər ürpərir xəyal quranda,
Tənhalıq qəlbinin yelkənləridir.
Çölün bir məzarın sükutu kimi,
İçinsə, fırtına, alov kimidir.

Gör necə yanmışam sənin oduna,
Bir baxsan sovrulan mənim külümdür.
Deyirlər: "Ayrılıq ölüm deyil ki",
Ayrılıq - ölümdən betər ölümdür.

"Möcüzə içində həyat"

Yaşardıqca gözlərim
Yüksəlir ah nəfəsdən.
Soyuqlaşır əllərim,
Çox qorxuram bu səsdən.

Bu səs tikan olub
batır qəlbimə
xəyalın buz qaynar bulağı kimi.
Duyğular çevrilir
zəhərə, qəmə
İllərin ot basmış alağı kimi.

Ürəyim nə yaman soyuyur mənim.
Özüm öz-özümə qənim kəsildim.
Bir ömrün xəfifcə səhər küləyi,
Səni görən kimi tir-tir əsirdi.

Bu quru çətirlər, bu yaş çətirlər
İndi nə qüssəni, nə qəmi örtür.
Məni də unutdu, məni də atdı
Min dəfə gəzdiyim küçələr, tinlər.
Möcüzə içində həyat yaşatdı
Qırılan ürəklər, sınan ürəklər.

"Sən mənim sevgimin daş heykəlisən"

Sən mənim sevgimin daş heykəlisən.
Mən sənin sevginin işıqlı yazı.
Sönən ümidlərin son ahəngisən,
Mənsə, ümidlərin bəyaz ulduzu.

Bu illər, fəsillər, ayırdı bizi,
Bu illər, fəsillər qovuşdurmadı.
Vurğun qəmimizdən bizə savayı
Həyatda əbədi heç nə qalmadı.

Bilmirəm, sən mənim qismətim idin?
Bilmirəm, mən sənin birinci andın?
Sən mənim dünyada ilk qışım idin,
Mən sənin dünyada ilk baharındım.

"Bir anlıq xatirələr"

Mən səndən nə istədim?
Xoşbəxt olmaq bəlkə də.
Sənsə, nə istəyirdin?
Düşünürəm hələ də,
amma tapa bilmirəm.

Ümidlərim sən idin,
Gülüşündə açırdım.
Sanki gül-çiçək idim,
Səndə sevinc tapırdım.
İndi tapa bilmirəm.

Bir çılğın vəsvəsədə
Yenə düşdün yadıma.
Qısa cümlələr ilə
Arzumu anlatdığım,
Günlər gəldi yanıma.

Bir az ürək ağrısı,
Bir az da ki, karıxmaq,
Xəyalına əl atdım
və çatmadı dadıma.

Dərdi doyunca çəkdim,
Nəydi axı günahım?
Tumurcuqlu günəşin
Mən idim ilk qurbanı.
Mən idim ilk atılan
Mən idim unudulan.

Susmağın şiddətini,
Sən öyrətdin, deyəsən.

Nə tez keçdi bu ömür?
Nə tez haqladı bizi?
Ayrılığın açarı,
Döydü qapı, dəhlizi
döydü
pəncərəmizi.

Səni kim aldı məndən?
Kim aldı səndən səni?
Pay alaraq kədərdən
Ayırdım məndən məni.

Tarix: 4-07-2021, 10:30 Oxunub: 192

Bölməyə aid digər xəbərlər

4-07-2021, 10:00 Şair Aqşin Dadaşoğlu

15-06-2021, 17:59 ŞEİRLƏR

29-05-2021, 20:00 Allah rəhmət eyləsin

21-05-2021, 07:58 İki oğlu şəhid olan ana: “Ən böyük arzuları düşməndən qisas almaq idi” – FOTOLAR

16-05-2021, 16:00 Şeirlər

13-05-2021, 12:18 LAÇINSIZ DÜNYANI NEYNİRƏM AXI?!

24-04-2021, 11:00 UZAQ XARKOV VİLAYƏTİNDƏ İMAM ƏLİ ADINA MƏSCİD

19-04-2021, 09:00 Oruc tutmaq sağlam olmaq deməkdir

7-03-2021, 22:45 Təbrik edirəm!

9-10-2020, 21:22 Azərbaycan Prezidenti İlham Əliyev xalqa müraciət edib