ALLAH ŞƏHİDLƏRİMİZƏ RƏHMƏT EYLƏSİN!

Dünyada hər şey gözəldir, lakin ən müqəddəs duyğu Vətəni özününkü olduğu üçün sevmək, qoynunda boya- başa çatdığın torpağın müqəddəsliyini hiss edib yolunda canından keçməyə hazır olmaqdır.
Tarixin hansısa səhifəsini vərəqləyib bir xalqın taleyinə yazılmış qəhrəmanlıq salnaməsinə diqqət yetirdikdə dəyişməyən bir həqiqətin şahidi olursan. İnsanlarda anadangəlmə hiss, duyğu olan, nəyinsə, kiminsə naminə canından belə keçmək cəsarəti məqamı yetişəndə başqalarından fərqli xüsusiyyət mütləq özünü büruzə verir. İnsanı məhkum etmək olar, lakin şücaəti, mərdliyi, vətənpərvərliyi şərəfi və fədakarlığı boğmaq olmaz. Milli mənsubluğuna görə fərqlənən bu keyfiyyət insanın daxili gücünün, qətiyyətinin, bəzən də barışmazlığın, ədalətsizliyə qarşı mübarizliyin nümunəsi, məkanı isə müqəddəs sayılan şəhidlik zirvəsi olur.
...Müstəqillik əldə etdikdən sonra dilimizdə yaşam hüququ qazanan, 20 Yanvar faciəsindən başlayaraq Xocalıya uzanan, hələ də davam edən Dağlıq Qarabağ müharibəsinin ağrı-acısını ifadə edən şəhid sözü qəhrəmanlıq simvolu kimi də hər kəsdə qürur hissi oyadır. Ermənistanın Azərbaycana hərbi təcavüzü zamanı müstəqilliyimiz, ərazi bütövlüyü uğrunda qurban gedənlər hər qarış yurd yeri üçün canlarından keçərək müasir qəhrəmanlıq tariximizin səhifələrini dönməzlikləri, ölümün gözünə dik baxmaq bacarıqları ilə yazdılar. Azərbaycanın hər bölgəsində and yeri kimi müqəddəslik qazanmış Şəhidlər xiyabanlarında əbədi məskən salmaqla gənclərimizə örnək oldular. Şəhidlərimiz ölümləri ilə bir həqiqəti təsdiqlədilər: qəhrəman o insandır ki, özünü həyat uğrunda mübarizələrdə ölümə qalib gəlməklə təsdiqləyir.
Sumqayıt şəhəri 38 saylı tam orta məktəbin şagirdləri məktəbin məzunlarından şəhid olanların ailələrini daim ziyarət edirlər. Bu barədə məktəbin direktorəvəzi Nərgiz xanım danışdı:
-Şəhidlər hər birimizin qəlbində müqəddəs yer tutan ali insanlardırlar. Onların sayəsində biz bu gün azadlığımızı, qələbəmizi yaşayırıq. Qazilərimizin sayəsində biz 30 il həsrətində olduğumuz torpaqlarımıza qovuşduq. O torpaqlar bu gün hər birimizin ziyarət etdiyimiz ən müqəddəs yerdir. O tirpaqların həsrətiylə onlarla vətəndaşımız əbədiyyətə qovuşdu. O tirpaqları alan şəhidlərimiz isə bizim ziyarətgahımızdır, onları ailələrini yaxınlarını ziyarət etmək də hər birimizin müqəddəs borcudur.
Bizim məktəb ənənəvi olaraq təkcə əlamətdar günlərdə deyil, hər zaman şəhid silələrini ziyarət edirlər. Şəhidlər xiyabanına gedib şəhidlərimizin məzarlarına əklillər qoyurlar. 44 günlük İkinci Qarabağ müharibəsində Vətən torpağının hər qarışını canından əziz bilib bu yolda şəhidlik zirvəsinə ucalan minlərlə övladlarımızdan bir də Məmmədov Ruslandır. Bu günlərdə şagirdlərimiz qəhrəman şəhidimiz Məmmədov Ruslanın ailəsini ziyarət etdilər. Şəhidimizin anası ilə bərabər şəhidin adını daşıyan müqəddəs sbidənin önünə gül dəstələri qoyub xatirə şəgilləri çəkdirdilər.
Bəli, Vətənə olan sevgi Anaya olan sevgi ilə bir tutulur. Ana Vətən anlayışı da bu sevgidən yaranır. İnsan bir ailədə doğulsa da, Vətən torpağında böyüyüb boya-başa çatır, suyu və havası ilə qidalanır. Bunun üçün də onu müdafiə etməyə və qorumağa hər zaman borcludur. Tarixi qəhrəmanlıq ənənələrini qoruyan oğullarımız döyüş meydanında düşməni 44 günə darmadağın edərək tarix yazdı. Ali Baş Komandanın rəhbərliyi altında, xalqın dəstəyindən güc alan mərd oğullarımız qısa müddət ərzində tarixi torpaqlarımızı işğaldan azad etdilər. Bu döyüşlərdə şəhadətə yüksələnlər də oldu. Bu gün müqəddəs amal uğrunda şəhadətə yüksələn oğullarımızın ruhu rahatdır. Onların hər biri Böyük Qələbənin həsrətində idi. Tarixi torpaqlarımız düşməndən təmizlənib, o torpağın əsl sahibləri yurdlarına qayıtdılar.

Mahir Hümbətov,
Yeniazərbaycanhəyatı.com

informasiya portalının təhbəri