... Bu yolu bütün insanlar keçiblər və yenə keçirlər. Elə bir insan yoxdur ki, məktəbə getməsin, parta arxasında əyləşməsin və müəllimindən elm, öyüd-nəsihət almasın. Çünki bu özü bir ömür yoludu və bu ömür yolunu çoxları addımlamağa məcburdur. Sumqayıt şəhərində də zamanından və məkanından asılı olmayaraq, bütün dövrlərdə təhsilə, elmə və tədrisə böyük önəm verilib. Təbii ki, hər bir kəsin ömür yolunun təməli də məktəbdə qoyulur. Bu təməli də təbii ki, ibtidai sinif müəllimləri qoyur. Onların zəhməti heç bir zaman nə unudulur, nə də yaddan çıxır. Belə ibtidai sinif müəllimlərindən biri də Sumqayıt şəhəri 21 saylı tam orta məktəbin ibtidai sinif müəlliməsi Natella Bəşirovadır. Natella xanım gənc olmasına baxmayaraq öz sözünü deyə bilən müəllimlərdəndir. Onunla balaca bir söhbət edirik. Müəllimənin dediklərindən:
-Müəllim sözünü, şərəfini və qürurunu bu adı daşıyan insanlar həmişə uca tutublar. Çünki əsl müəllim, əsl ziyalı və böyük işıq deməkdir. Onun düşüncəsindən, savadından minlərlə insan qida alır. Əlbəttə, belə müəllimlərə həmişə xalq arasında böyük hörmət qoyulub. Bu məktəbdə də öz peşəsini sevən və müəllim şərəfini uca tutan ziyalı insanlar var.
Hər bir müəllim jurnalı götürüb sinfə girəndə və dərs deyəndə fikirləşmirlər ki, hansı çətinliklərlə, hansı əziyyətlərlə və hansı problemlərlə üzləşəcəklər. Onlar fikirləşirlər ki, bir 45 dəqiqədə parta arxasında əyləşən şagirdlərə nəyi öyrədəcəklər və necə öyrədəcəklər. Bu müəllimlər onu da fikirləşirlər ki, parta arxasında əyləşən o şagirdlərə lazımı bilikləri vaxtında verməsələr, həmin şagirdlərdən deyilən dərsi tələb etməsələr, onlar məktəbi bitirəndən sonra çox əziyyətlə üzləşə bilərlər.Təbii ki, hər bir şagirdin həyatında məktəb illərinin yeri və önəmi vardır. Yaxşı oxumaq və ya gələcəkdə yaxşı yaşamaq və ya işləmək də məhz məktəbdən başlayır. Hər bir şagird bilməlidir ki, məktəb onların gələcəyinin təməl daşını qoyan bir müəssisədir. Bu təməl daşı nə qədər möhkəm olarsa, o qədər yaxşı olar. Yəni irəlidə yaşayacağı çətinliklərdən üzü ağ çıxmağı bacara biləcəkdir.
Bəli, hər bir sənətin çətinliyi vardır. İbtidai sinif müəllimlərin isə çətinliyi daha çoxdur. Çünki onlar oyun meydançasında toplanıb gətirilən körpələrə yeni həyat dərsi verməyə çalışırlar. Yəni, oturmağı, durmağı, yazmağı, oxumağı öyrətməyə çalışırlar. Bunun nə qədər əziyyətli və çətin olduğunu da hamımız bilirik. Lakin irəliləyən zamanlarda körpələrin yazdıqları ANA, VƏTƏN sözlərini oxutanda insanın ürəyi dağa dönür. Sevinirsən ki, sən nə yaxşı ki, bu şagirdlərə bu sözləri açılaya bildin. Onu da deyim ki, insan oxuduğu illər ərzində çox müəllimlərlə qarşılaşır. İstər orta məktəbdə, istərsə də ali məktəbdə. Düzdür, onların heç biri yaddan çıxmır, unudulmur, hər birinin də şagird, tələbə ürəyində yeri qalır. Lakin ibtidai sinif müəllimi insanın ömrü boyu yadından çıxmır. Aradan illər keçsə belə yenə də ibtidai sinif müəlliməsi hörmətlə xatırlanır, yada salınır və kimliyindən asılı olmayaraq, bax bu mənim ilk müəllimim olub deyirlər. Bu da təbii ki, bizim üçün ən böyük sevinc payıdır.
Natella Bəşirova sənətini sevən, ona vicdanla yanaşan müəllimlərimizdən biridir. Sənətini sevən müəllimlər isə bütün çətinliklərə sinə gərə biləcəklər. Danılmaz faktdır ki, ibtidai sinif müəlliminin zəhməti böyükdür. Onlar ilk dəfə şagirdlə öyüd, nəsihət verirlər, bilik, savad verirlər, yazmağı, oxumağı öyrədirlər. Bir də axı vaxtında verilməyən öyüd nə vaxtsa o şagirdin həyatda uğursuzluğuna səbəb olur. Amma nə yaxşı ki, bu cür vicdanlı, namuslu və ziyalı müəllimlərimiz var. O müəllimlər həmişə şagirdlərinin, məzunlarının yaddaşında qalacaq və xoş xatirələrə çevriləcəklər... Elə Natella müəllimə kimi...

365 gün