Göyçə ana yurdum mənim

Göyçə ana yurdum mənim Hər bir insanın dünyaya gəlişi , həyat və fəaliyyəti müəyyən missiya ilə əlaqədardır… Bu mənada hər kəs yaşadığı dövrdə Tanrı tərəfindən ona həvalə olunmuş missiyanı həyata keçirmiş olur. Bəşəri duyğularla yaşayan , xalqına, millətinə layiqli övlad olmağa çalışan, onun yolunda hər cür fədakarlığa hazır olan insanlar Tanrı tərəfindən ona həvalə olunmuş missiyanı səssiz-küysüz icra edir və bundan xüsusi zövq alır... Belə insanlardan biri də Hacı Zahiddir. Hacı sözü indi Həcc ziyarətinə gedən hər bir insanın adının qarşısına titul kimi yazılır. Bəzi insanlar var ki, bu adı elə belə adının önünə yazdırır, bəzi insanlar da vardır ki, həccin qoyduğu qanun qaydalara riayət edərək yazdırı. Hacı adına təbii ki, bu yüzlərlə insanların içərisində beş-on nəfər var ki, bu adın ağırlığını hiss edir, adına layiq əməllər etməyə çalışır. Çünki insanların içində bir qorxu vadır ki, o da Allah qorxusudur. Bu qorxudan özünü qoruyanlardan biridir Hacı Zahid. Hacı uzun illərdir ki, Sumqayıt şəhərində yaşayır və işləyir. Sumqayıt şəhərində çox az adam tapılar ki, Hacının əllərinin hərarətini hiss etməmiş olsun. Məscidə üz tutan hər bir imkansıza, hər bir yoxsula əlini uzadan, onların üzlərini güldürmək sanki hacının ən böyük vəzifəsidir. Sanki deyirəm, ancaq bu kəlimə yersizdir, elə Hacının ən böyük vəzifəsi insanların üzündə təbəssüm yaratmaqdan ibarətdir. Mən uzun illərdir Zahid müəllimi tanıyıram. Bu uzun illər ərzində də bu insanın necə təmkinli, necə sadə olduğunu gördüm. Dəyişməyən insandır Hacı Zahid. Onu bu dünyanın var-dövləti dəyişdirə bilmədi, özü üçün cızdığı yolla həyatına davam edir. Əslində mənim fikrim Hacıdan yazmaq deyildi, onunla yaxından tanıdığı bir insan haqqında söhbət etməkdi. Lakin söz dözü gətirər deyirlər. Mən də Hacı haqqında yeri gəlmişkən ürəyimdən keçənləri qələmə almaq istədim. Onun tanıdığı şəxsiyyət barədə isə söhbətimiz qalsın sonraya. Bəli, Hacı uzun illərdir Sumqayıt Cümə Məscidində işləyir. Məsciddə işləmək mən elə bilirəm ki, həddindən artıq çətindir. Çünki məscidin qapısını açan insanların hamısı dərd əlindən qaçaraq Allahın evinə sığınırlar. Bu ümid evində kimisə emidsiz etmək də mümkün deyil. Hacı ona üz tutan insanların hamısına demək olar ki, kömək əlini uzadır. Təmkinli, sadə, dəmir iradəsi olan Hacı Zahid demək olar ki, 44 günlük müharibədə şəhid olan balalarımızın hər birinin yas mərasimində iştirak etdi, onların 3-7 və 40 mərasımlərini din xadimi kimi özü apardı. Dəfələrlə görmüşəm ki, buy as mərasimlərindən qayıdanda Hacının necə dünyası alt-üst olub. Bu cavan, dünyadan lam almayan gənclərimizi torpağa tapşırmağın ağırlığını Hacı Zahid demək olar ki, çiyinlərində daşıyıb. Müdriklik mən elə bilirəm ki, budur. Budur Müdriklik zirvəsi. Hacı Zahid sözün əsl mənasında müdrik adamdır, Əsl insan üçün ən xarakterik keyfiyyətlərdən biri də məhz əzmlə işləmək, əldə olunan nəticələrlə arxayınlaşmamaq, bütün dövrlərdə cəmiyyətə fayda verməyə çalışmaqdır. Şərəfli ömür yolu, dinə səmimi bağlılığı ilə cəmiyyətdə rəğbət qazanmış din xadimidir Hacı Zahid Göyçəli. Zahid müəllimin həyatı boyu ürəyində gəzdirdiyi yeganə bir arzusu var. O da doğulub boya-başa çatdığı Göyçə mahalını görmək. Əslində o yurddan didərgin düşənlərin ən böyük arzsudur yenidən o yurda qayıtmaq, o yurdu görmək. Hər kəs kimi ürəyində bir Göyçə həsrəti yaşadan Zahid müəllimə inşallah o torpaqları görmək nəsib olacaqdır. Azərbaycan xalqının, eləcə də bütün türk xalqlarının tarixini, həyat və məişətini, adət-ənənələrini əks etdirən “Dədə Qorqud” dastanında olduqca gözəl və orijinal bir motiv var. El-obada önəmli bir hadisə olduqda ən uca dağların başında tonqallar yandırılardı ki, hamı xəbər tutsun. Uca zirvələr hər yerdən görünür. Onlar aldatmır, şübhə doğurmur, onlar ali həqiqətlər kimi daim insanların gözləri önündə olurlar. Bu uca zirvələr həm də öz istedad və biliyi, şərəf və ləyaqəti, gərgin əməyi, əzmi, çalışqanlığı ilə bir ömür Vətənə, xalqa, bütün insanlığa xidmət edən böyük şəxsiyyətlərdir. Hacı Zahid Göyçəli də belə şəxsiyyətlərdən biridir. Allah ona o qədər ömür versin ki, Göyçə mahalını görmək, dədə-babasının məzarlarını ziyarət etdiyi günü ömrünün ən gözəl günü kimi ömür kitabına yaza bilsin. Bu təkcə onun deyil, eyni zamanda Qərbi Azərbaycandan didərgin düşənlərin hamısın arzusudur. Uca Tanrı arzunuza çatdırsın, Hacı Zahid Göyçəli.

Tahirə Həbliyeva
Göyçə ana yurdum mənim