8 NOYABR QƏLƏBƏ GÜNÜMÜZDÜR

Hüquqşünas, Nəğməkar şair kimi tanıdığımız şair Qafarov Ədalət İzzət oğlunu (Əroğlu) ilə uzun müddətdir ki, tanıyıram. Onu tanıdığım illər hardan baxsaq 30 ildən çox bir vaxtı əhatə edir. O vaxtlar Ədalət müəllim Sumqayıt şəhər Məhkəməsində işləyirdi. Qeyd edim ki, Ədalət Qafarov hüquqşünas kimi uzun illərdir ki, xalqımıza, doğma Sumqayıt sakinlərinə hüquq xidməti göstərir. Son zamanlar ədəbi aləmdə də öz şeirləri ilə sözünü deməyi bacarmışdır. Həmin vaxtdan da onun şeirlərinin vurğunuyam. Onun vətən həsrətiylə yazdığı şeirləri, doğma Hovuslu kəndinə, şəhidlərimizə, qazilərimizə, doğma Sumqayıtımıza həsr etdiyi şeirlər bu gün də hər kəsin dilinin əzbəridir. Onun Ali baş Komandanımız cənab İlham Əliyevə həsr etdiyi "Yaşa Baş Komandan, Yaşa, igidlər!" adlı şeiri dəfələrlə mətbuat orqanlaırnda, kitab və jurnallarda dərc edilmişdir. Şagirdlərimiz bütün əlamətdar günlərdə bu şeiri səsləndirirlər. Şairin "Şuşa" adlı şeiri bu gün də öz aktuallığını saxlayır. Oxucularımıza Şair Ədalətin bir neçə şeirini təqdim edirəm.

Ş U Ş A

Sabahların Xeyir, möhtəşəm Şuşa!

İki Türk bayrağım dayanıb qoşa.

Sevincdən millətim gəlibdir cuşa,

El-oba şəninə, mahnılar qoşa.

***

Qələbə sevincin bölüşəm gərək,

Ulu yurdum ilə görüşəm gərək,

Sarılıb boynuna, öpüşəm gərək,

El-oba şəninə, mahnılar qoşa.

***

Əsməsin Üstündən heç zaman külək,

Düşmən acısını biryolluq silək.

Vətən torpağının qədrini bilək,

El-oba şəninə, mahnılar qoşa.

***

Şuşa bayatımdır, Şuşa muğamım,

Bir daha yüksəldi, enməz Bayrağım,

Düşmənin kəsmişik yurddan ayağın,

El-oba şəninə, mahnılar qoşa.

***

Cıdır düzü, İsa bulağındayam,

Vaqiflə görüşmək arzusundayam,

Natəvan anamdan mən də bir payam,

El-oba şəninə, mahnılar qoşa.

***

Arzular sinəmdə bir meydan oldu,

İki doğma qardaş bütöv can oldu,

Türanım yolumda açan dan oldu,

El-oba şəninə, mahnılar qoşa.

***

Sən ey millətimin başının tacı,

İllərdir çəkirəm çox möhnət, acı,

Yalnız sənsən, dərdlərimin əlacı,

El-oba şəninə, mahnılar qoşa.

***

Şuşanın dağları, yaşıl yamacı,

Niyazi sevgisi, Bülbül inancı,

Qanla suvarıldı, yalı, yamacı,

El-oba şəninə, mahnılar qoşa.

***

Sənsən üzüyümün qaşı ay Şuşa!

Əzizdir torpağın-daşın, ay Şuşa!

Bir də dərd görməsin başın, ay Şuşa!

Əroğlu şəninə, mahnılar qoşa.

***

QİYMƏT VERƏN, ZAMANDIR

(Qazilərimizə ithafən)

Xalqımızın başın uca etdilər,

Qaziləri incitməyin, amandır.

Vətənimin ürəyidir Qazilər!

İgidlərə qiymət verən, zamandır.

***

Bir əmirlə "Dəmir Yumruq" oldular,

Daşnakları “alaq kimi” yoldular.

Doğma yurdlarını geri aldılar,

İgidlərə qiymət verən, zamandır.

***

Ölümündən keçəcəyin bildilər,

Alnımızdan o ləkəni sildilər,

Zəfər çalıb, alnı açıq gəldilər,

İgidlərə qiymət verən, zamandır.

***

Vətənini Ana bilib, seçdilər,

Bayrağa sarılb, and da içdilər,

Məharətlə döyüşlərdən keçdilər,

İgidlərə qiymət verən, zamandır.

***

Əroğluyam, ədalətim var mənim,

Dövlətimə sədaqətim var mənim,

Qazilərə məhəbbətim var mənim,

İgidlərə qiymət verən, zamandır.

ŞƏHİDİMİZ NOVRUZA

Novruzda göz açdın fani dünyaya,

Şükr etdi qohumlar verilən paya,

Ucaldı şöhrətin Günəşə, Aya,

Qeyrətindən seçdin Şəhid adını.

***

Köksünü sən verdin oda, ocağa,

Çəkilib durmadın küncə-bucağa,

Alqış olsun sənin kimi qoçağa,

Qeyrətindən seçdin Şəhid adını.

***

Taxdığın üzüyün barmaqda qaldı,

İstəkli sevgilin duvaqda qaldı,

Yazdığın məktubun varaqda qaldı,

Qeyrətindən seçdin Şəhid adını.

***

Məzarın cənnətdir, gülə boyanıb,

Önündə baş əyir, dostlar dayanıb,

Sənin yoxluğuna yadlar da yanıb,

Qeyrətindən seçdin Şəhid adını.

***

Yazdın ki, “ağlama, ay, anam-bacım!”,

Üçrəngli bayraqdır başımda tacım,

İndi məqamıdır, sirrini acım:

Qeyrətindən seçdin Şəhid adını.

***

Novruzum! Vətənlə eyni cahansan.

Vətənə ürəkdən qan verən cansan.

Turan adlı bütöv Azərbaycansan!

Qeyrətindən seçdin Şəhid adını.

***

İgid Qəhrəmansan, şəhid Qəzənfər

Yerin könüllərdir, adın var olsun,