Larisa Məmmədova - Bir az Ukrayna, bir az Azərbaycan...

Qızımın 9 yaşı var. Avtobusa minəndə sürücülər ona görə ödəniş götürmür. Deyirlər, körpə uşaqdı, gedin...
Kaş götürələr, götürməyəndə hər dəfə 13 yaşlı şəhidimiz Larisa ağlıma gəlir, əvvəl ağlıma gəlir, sonra ürəyimə...
O da 35 il əvvəl elə bu axşam, 19 yanvarda atası ilə avtobuslarını həyətə gətirməyə getmişdilər.
***
Larisa anasına demişdi ki, adımı sevmirəm, pasport alanda dəyişib Leyla edəcəm....
Həmin axşam isə şəhərin qarışdığını görən atası Fərman anası Qalinaya deyir ki, avtobusu yaxşı yerdə saxlamamışam, gedim , həyətə gətirim...
Sarı avtobusuna doğru gedəndə sarı qızı Larisa da ondan əl çəkmir. O qədər şirin olur ki, yox deyə bilmirlər. Fərman yaraşıqlı Qafqaz kişisi, Qalina ukrayna gözəli - Larisanın şirin olmamağa zərrə şansı yox idi. Anası da, atası da bir-birinə baxıb yenə də qızlarının istədiyini edirlər. Bu da azmış kimi ən təzə paltarını geyinir və atası ilə avtobuslarını gətirməyə gedirlər.

Qalina səhərə qədər onların yolunu gözləyir. Səhər sarı avtobusları yox, qara xəbərləri xəbərləri gəlir... Atası ayağından yaralanıb, 13 yaşlı Larisa isə ürəyindən vurularaq şəhid olub.
Yəqin ki, ürəyi də elə bir pulemyot gülləsi boyda idi - 7.62
Sərçə Larisa...
20 yanvar avtobusumuzun körpə balası...
***
Təəssüf, bu gün Larisanın anasının vətənində - Ukraynada, elə hər gün "20 yanvar"dır...
Bitməyən bir cümə gecəsi. Qara cümə...
35 il əvvəl şəhid olan 13 yaşlı Larisanı unuda bilmirik, ancaq Ukraynada hər gün sarısaç körpələr topların "layla"sında əbədi yatırlar.
Eynən 1990-cı ildə Bakıda olduğu kimi indi hər gün Ukrayna şəhərlərində rus dilində danışan əsgərlər, zabitlər və rus dilində atəş açan tanklar "tarix yazır" - "20 yanvar".
Yüzlərlə sarısaç larisalar, qarasaç leylalar, vladimirlər, fərmanlar NATO-nu, Dostoyevskini tanımadan ölürlər...
O qədər tez ölürlər ki, haqlarında çox danışmaq da olmur - bütün söhbətlər özləri boyda olur - 13 yaşlı, sarı saçlı...
Bəxtiyar Vahabzadənin Larisaya yazdığı şeir də belə bitirdi:
Övladıydın iki xalqın.
Bu dostluğa mən də uydum, sən də uydun.
Sən dostluğun simvoluydun.
Bunudamı bu gün bizə çox gördülər?
Elə bil ki, səninlə bir
Bu dostluğu öldürdülər...
Sərdar Amin
Xüsusi olaraq “Qafqazinfo” üçün

Tarix: 19-01-2025, 14:38 Oxunub: 15

Bölməyə aid digər xəbərlər

25-11-2024, 10:23 75 yaşlı Sumqayıt: Son 10 ildə reallaşan 75 YENİLİK

21-09-2024, 08:17 14 noyabr 2023-cü il tarixdə 29 yaşı qeyd olunan Şəhidimiz Cavid Mirzəyevin həyat hekayəsi...

7-06-2024, 07:51 Sumqayıt: Gözəlliklər şəhəri, möhtəşəm quruculuğun ünvanı

29-05-2024, 09:46 Prezidentlə xanımı xocalılılarla... - Yenilənib

27-05-2024, 11:38 Pulsuz qaldığım şəhərdə pendirə 88 manat verdim - Fotolar

26-05-2024, 09:43 İlham Əliyev əfv Sərəncamı imzaladı

19-05-2024, 11:11 Sumqayıt Heydər Əliyevin arzuladığı şəhərə çevrilib

15-02-2024, 13:24 70-lərin kəsişməsində: 70-ci illərdə başlayan Sumqayıt sevgisi, 70 il və 70 yenilik

20-07-2023, 07:54 ALLAH ŞƏHİDLƏRİMİZƏ RƏHMƏT EYLƏSİN!

20-06-2021, 10:30 SON İLLƏR SUMQAYIT NECƏ İNKİŞAF ETDİ? - FAKTLAR