“İşdən çıxarılmağımı iclasda qaldırdılar, direktorun qohumları səs verdi”

“Yanvarın 28-i dalandar kimi çalışdığım İmişli rayonu Qoşqar Tarverdiyev adına Hacıalmuradlı kənd tam orta məktəbindən qanunsuz şəkildə 70 “Ç” bəndi ilə işdən çıxarılmışam”.

Onun sözlərinə görə, 2017-ci ildən çalışdığı məktəbdə öz vəzifəsinə məsuliyyətlə yanaşsa da, direktor Ruslan İbayev uzun müddətdir onu işdən çıxarmaqla hədələyib: “Bu günə qədər əməkhaqqımdan 1 manat belə tutulmayıb, şəxsi işimdə nə töhmət, nə xəbərdarlıq var. Yanvarın 28-i arxiv tabellərimə də baxıldı, hamısının qarşısında işə vaxtında gəlib getməyimlə bağlı imzam var. Lakin məktəbin direktoru Ruslan İbayev mənə uzun müddətdir deyirdi ki, ərizəni yaz, işdən çıx. Niyə ərizə yazıb işdən çıxmalı idim? İşə gecikirdimsə, ya xəbərdarlıq edərdi, ya töhmət verərdi, ya da həmin günün maaşından tutulardı.
Mənə söylədi ki, regionalın müdiri Bəhruz müəllim göstəriş verib ki, ərizəni yazıb işdən çıxmalısan. Dedim haradan tanıyır məni? Cavab olaraq isə “çox danışırsan, ərizəni yazıb çıx, çıxmırsansa, səni 70 “Ç” ilə işdən çıxaracağam”, - deyə bildirdi. Yanvarın 28-i məni işdən çıxardı. İki ay bundan əvvəl də bir şəhid qardaşını işdən çıxarmışdı.
İşdən 70 “Ç” ilə çıxarılmağım ədalətsizlikdir. Bundan əvvəl məktəb direktoru Famil İbişov idi. Onun vaxtında da mənim töhmətim olmayıb, hansısa problem də yaşamamışam. Harasa getməliyəmsə, hansısa vacib işim olubsa, rəsmi şəkildə ərizə yazıb, icazə almışam”.
Şikayətçi iddia edir ki, R.İbayev məktəbin ehtiyaclarını bəhanə edərək ondan dəfələrlə pul istəyib: “2022-ci ildə direktor kimi gələndən sonra 4-5 dəfə məndən 40-50 manat pul aldı. Bir dəfə dedi ki, məktəbə mühərrik və su şlanqı alınmalıdır, daha sonra ağac əkilməli və “setka” çəkilməli olduğunu söylədi. Son vaxtlar deyirdi ki, bu pulu artıq daim verməlisən. Mən də etirazımı bildirdim, belə bir şeyi qətiyyən etməyəcəyimi söylədim. İki körpə övladım var, səkkiz saat işləyirəm, 395 manat maaş alıram. Mən hər dəfə ona necə pul verim? Niyə verməliyəm? Özü də əməkhaqqı alır, məktəb üçün nəsə edə bilirsə, etsin, edə bilmirsə, hər ay mən 50 manat verməliyəm? Elə bu məsələnin üstündə çox təkid etdi ki, ərizə yazıb işdən çıx, mən də onun dediyini etmədim. Hətta məktəbin gözətçisindən də pul alıb, ondan minlərlə manat pul tələb edib. Həmin adamın əlində faktlar, direktorun səs yazıları var idi, şikayət etdi. İş də hazırda prokurorluqdadır”.
Yanvarın 28-i Həmkarlar İttifaqının iclasında haqqında müsbət qərar verildiyini deyən İ.Həsənov elə həmin gün direktorun onu işdən azad etdiyini bildirib: “Həmkarlar İttifaqının sədri Gülnar Zeynalovanın iştirakı ilə iclas keçirildi. İclasda məni səsə qoydular. İşçilərin hamısı dedi ki, İmaməddin qalsın, çıxarılmasın. Ruslan İbayevin həyat yoldaşı, rəsmxətt müəllimi Rəmziyə İbayeva, əmisi oğlu, hərbi işlər üzrə direktor müavini Anar İbayev və onun həyat yoldaşı Günay İbayeva əllərini qaldırdı ki, işdən çıxım. Digər müəllimlər də “getməsin, vaxtlı-vaxtında işinə gələn biridir” dedilər. Hətta bir müəllim bildirdi ki, işə gəlmirdisə, maaşından tutardınız, rəsmi xəbərdarlıq edərdiniz: “Töhmət vermədən, rəsmi xəbərdarlıq etmədən aramızda səsə qoyursunuz, bizlik bir şey yoxdur”.
Daha sonra Gülnar Zeynalova da dedi ki, arxiv tabelinə baxıb, belə işçinin səsverməyə çıxarılması da gülüncdür. Orada mənim xeyirimə qərar verildi, bildirildi ki, 3 nəfərin iddiası haqsızdır. Amma axşamüstü İmişli rayonunun sektor müdiri Elşad müəllimlə məktəbin direktoru Ruslan müəllim dedi ki, ya ərizəni yaz, ya da səni məcbur biz çıxaracağıq. Video da var əlimdə. Özlərinə də onları məhkəməyə verəcəyimi, Əmək Müfəttişliyinə şikayətimi bildirəcəyimi söylədim. Dediyim kimi, müraciət etdim, məsələnin 15-30 gün ərzində araşdırılacağını, araşdırma müsbət nəticə verərsə, işimə bərpa olunacağamı, direktorun isə cərimə ediləcəyini bildirdilər”.
Fotoda Ruslan İbayev

İmaməddin Həsənovun iddiasına görə, direktorun onunla qalmaqallı münasibətinə başqa səbəb də var: “Direktor Gülnar Zeynalovanın işdən çıxarılması barədə olan sənədə bütün işçilərin adını salıb və saxta imza çəkib. Regiondan yoxlama gəldi, izahat alındı, dedim ki, həmin sənəddə adıma olan imzadan xəbərim yoxdur, ekspertizaya verib araşdırın, görün bunu kim edib? Həmkarlar tərəfindən bayramlarda iki dəfə maaş kartıma 50 AZN pul köçürülüb, hər il bir dəfə istirahət üçün göndərişimi götürürəm. Həmin qurumdan heç bir narazılığım yoxdur. Sonra direktor mənə dedi ki, sən nahaq bu işi gördün.
Bildirdim ki, mənim adımdan niyə qeyri-qanuni iş görülməlidir ki? Mənim xəbərim olmadan adım oraya salınıb, üstəlik mənim imzamın oxşarı kimi qol çəkilib. Bu, düzgün deyil. O da dedi ki, mən belə məsləhət görmüşəm. Bu hadisədən sonra dedi ki, səni işdən çıxaracağam. Hətta dəfələrlə atama da zəng edib onu narahat edirdi ki, oğlun işdən çıxsın”.
Səsləndirilən iddialarla bağlı Mil-Muğan Regional Təhsil İdarəsinə sorğu ünvanladıq. Cavab olaraq bildirildi ki, idarə tərəfindən təhsil müəssisələrində fəaliyyətin səmərəliliyinin artırılması, əmək intizamına riayət olunması və tədris prosesinin keyfiyyətinin yüksəldilməsi məqsədilə mütəmadi olaraq monitorinqlər həyata keçirilir: “İmişli rayonu Qoşqar Tarverdiyev adına Hacıalmuradlı kənd tam orta məktəbində keçirilmiş monitorinq zamanı dalandar vəzifəsində çalışan Həsənov İmaməddin Əşrəf oğlunun əmək müqaviləsi üzrə öhdəliklərini yerinə yetirmədiyi, fəaliyyəti zamanı nöqsanlara yol verdiyi aşkar edilib. Qanunvericiliklə nəzərdə tutulmuş əmək funksiyalarını yerinə yetirmədiyinə görə onunla bağlanmış əmək müqaviləsinə xitam verilib”.
Məsələ ilə əlaqədar Dövlət Əmək Müfəttişliyi Xidmətinin də mövqeyini öyrəndik. Saytımıza bildirildi ki, qurum tərəfindən araşdırma aparılır: “Araşdırmanın nəticələri barədə əlavə məlumat veriləcək”.
Xatırladaq ki, ötən həftə sözügedən məktəb direktorunun şagirdlərdən birini döydüyü iddia olunaraq bununla bağlı videogörüntülər yayılmışdı. Məsələ ilə bağlı Mil-Muğan Regional Təhsil İdarəsindən isə bildirilmişdi ki, hazırda məsələ ilə bağlı araşdırma aparılır, şagirdə qarşı uyğunsuz davranışa yola verən şəxsin İmişli rayonu Hacıalmuradlı kənd tam orta ümumtəhsil məktəbinin direktoru olması ilə bağlı yayılan iddiaların həqiqəti əks etdirib-etdirmədiyi nəzarətə götürülüb.
Mədinə Useynova

Tarix: 4-02-2026, 15:45 Oxunub: 48

Bölməyə aid digər xəbərlər

31-12-2025, 13:34 Elxan İbrahimovun işdən çıxardığı müavin: “... gecə çağırıb deyir ki, ərizəni yaz çıx”

25-11-2024, 10:23 75 yaşlı Sumqayıt: Son 10 ildə reallaşan 75 YENİLİK

21-09-2024, 08:17 14 noyabr 2023-cü il tarixdə 29 yaşı qeyd olunan Şəhidimiz Cavid Mirzəyevin həyat hekayəsi...

29-05-2024, 09:46 Prezidentlə xanımı xocalılılarla... - Yenilənib

26-05-2024, 09:43 İlham Əliyev əfv Sərəncamı imzaladı

15-02-2024, 13:24 70-lərin kəsişməsində: 70-ci illərdə başlayan Sumqayıt sevgisi, 70 il və 70 yenilik

9-09-2023, 13:25 Hadrutda səngərdə olan zabitdən Ali Baş Komandana təsirli müraciət

20-06-2021, 10:30 SON İLLƏR SUMQAYIT NECƏ İNKİŞAF ETDİ? - FAKTLAR

5-03-2021, 22:53 Abdin Fərzəliyevdə “VURULDU” – icra başçısı vəzifəsinin yox , CANININ HAYIDADIR

22-09-2020, 15:08 Prezident Administrasiyasını belə heçə sayan “Konstra” MKT-nın qurbanları – Söhbət təkcə “qurban keçisi”ndən getmir