Sumqayıt Regional Mədəniyyət İdarəsinə tabeli Zəngilan rayon Mədəniyyət evinin dəstəyi, Zəngilan Rayon İcra Hakimiyyəti və Zəngilan rayon Polis şöbəsinin təşkilatçılığı ilə "Heydər Əliyev İli" çərçivəsində Polis Günü münasibətilə "Heydər Əliyev və Azərbaycan Polisi" adlı tədbir keçirilib. Tədbirdə Zəngilan RİH başçısı Ramiz Həsənov, İcra sturukturu, hüquq mühafizə orqanlarının rəhbərləri, Zəngilan Rayon Polis Şöbəsinin əməkdaşları, Azərbaycan Vətən Müharibəsi Veteranları Zəngilan rayon şöbəsinin kolletivi və qazilər iştirak ediblər. Tədbirə gənc mədəniyyət işçisi Zeynəb Bağır aparıcılıq edib. Öncə Vətən müharibəsi zamanı şəhid olan qəhrəmanlarımızın xatirələri bir dəqiqəlik sükutla yad edilib. Zəngilan Rayon Polis Şöbəsinin rəisi cənab Bəkir Cabbarov çıxış edərək, hüquq mühafizə orqanlarına göstərdiyi dəstəyə, diqqət və qayğıya görə dövlətimizin başçısına dərin minnətdarlığını bildirib, bundan sonra da Azərbaycan Respublikasının müstəqilliyinin, dövlətçiliyinin möhkəmləndirilməsi işinə sədaqətlə xidmət edəcəklərini, vətəndaşlarımızın təhlükəsizliyinin təmin edilməsi, ictimai asayişin qorunması istiqamətində səmərəli fəaliyyət göstərəcəklərini, polis adını şərəflə qoruyacaqlarını bildirib. Tədbirdə çıxış edən Zəngilan RİH başçısı cənab Ramiz Həsənov Azərbaycan Polisi Günü münasibətilə hüquq-mühafizə orqanlarının əməkdaşlarını təbrik edib, Azərbaycan polisinin ulu öndər Heydər Əliyevin dövlətçilik xəttinə, möhtərəm Prezidentimiz cənab İlham Əliyevin müdrik siyasətinə həmişə sadiq olduğunu bildirib və bunun daxili işlər orqanlarının əməkdaşları üçün ən böyük şərəf və qürur mənbəyi olduğunu qeyd edib. Sonra söz uzun illər Zəngilan rayon polis şöbəsinin rəisi kimi fəaliyyət göstərən ehtiyatda olan polis polkovniki cənab Səhyəddin Səfərova verilib. Azərbaycan Polisinin yarandığı gündən, 105 il ərzindəki uğurlu fəaliyyəti haqqında geniş çıxış edən polkovnik, polis mənsublarına gələcək fəaliyyətlərində müvəffəqiyyət diləyib. Çıxışlardan sonra, səmərəli fəaliyyətləri ilə fərqlənən Rayon Polis Şöbəsinin bir sıra əməkdaşları Rayon İcra Hakimiyyəti başçısının "Fəxri Fərman”ı ilə təltif olunublar. Keçmiş polis əməkdaşlarına və qazilərə hədiyyələr təqdim olunub. Daha sonra möhtəşəm konsert proqramı başlanıb. Konsertdə Azərbaycan Respublikasının əməkdar artistləri Almaz Orucova və Babək Niftəliyev, müğənni Mirələm Mirələmov, Tural Salmanov, Təranə Qumral, Musa Musayev, Məlahət Hüseynova, Sevgim Musazadə iştirak ediblər. İfaçılar "Xarıbülbül” instrumental ansamblının müşayiəti ilə bir-birindən maraqlı ifalar səsləndirərək tədbirə rəng qatıblar. Tədbir xoş ovqatla sona çatıb.

Mahir Hümbətov