Süz, Şıxəli, “Qarabağ” vuracaq!

Bir dəfə dünyagörmüş ağsaqqal kişilərdən biri dedi ki, hansı pulu nəzir deyirsən, onun başından bəla əskik olmur. Nəzirin qəbula yetəndə elə bil qəsdən elə problemlər yaranır, güc-bəla ilə o pulu əlində saxlayırsan. Demək, hansısa bir imtinanın predmeti olmaq, qurban getmək həm bıçaq altında, həm də yaranan əngəllərdən mühafizə kontekstində çox çətin məsələdir.
Qurban olmaq qədər çətin məsələdir… Qurban Qurbanovu deyirəm. O, dünən “Qarabağ”ın oyunundan sonra ilk açıqlamasında dedi ki, futbolçularım qəhrəmandırlar. Və doğrudan da, dünən Qurban Qurbanovun komandası Çempionlar Liqası naminə döyüşdü, qəhrəman kimi… Dünən “Qarabağ” üçün bilirsiz nə qədər qurban deyilmişdi..?
***
- Şıxəli, neçə yaşın var?
- 20.
***
“Matçdan sonra futbolçulara dedim ki, “Qarabağ”ın qələbəni necə bayram etdiklərinə baxsınlar. Azərbaycan klubu artıq mərhələni keçdiyinə inanır. Bu bizi cavab oyunu üçün həvəsləndirməlidir”.
Bunu “Ferentsvaroş”un baş məşqçisi Robbi Kin avqustun 20-də demişdi. Onda “Qarabağ” Çempionlar Liqasının pley-off mərhələsinin ilk oyununda “Ferentsvaroş”a 3-1 hesabla qalib gəlmişdi. Bu qeyri-təvazökar və el dili ilə desək, “yekəxana” açıqlama veriləndə “Qarabağ”ın Çempionlar Liqasının qrup mərhələsinə keçəcəyinə şübhə qalmamışdı.
Macarıstanlılar mərd və ictimai-siyasi baxımdan bizə həmrəy insanlardır. Prezident İlham Əliyev Ramil Səfərovu işğalda olan torpaq misalı məhkəmənin, dustaqlığın cəngindən alıb Vətənə gətirəndə Macarıstan adekvat mövqe sərgiləmişdi. Hətta Macarıstan Azərbaycanın Avropa İttifaqındakı bir nömrəli dostu adını da qazanıb.
Amma macarların böyüklüyünü özündə ehtiva edən tamam başqa nəsnə var:
Sultan İbrahim və IV Mehmed səltənətində müxtəlif vəzifələrdə xidmət edən Osmanlı dövlət xadimi, Misir bəylərbəyi, Osmanlıların son Buda (Macarıstanın şəhəri) bəylərbəyi Əbdürrəhman Abdi Paşa 1686-cı ildə Buda qalasının uğrunda gedən açıq döyüşdə həyatını itirib. Sonralar macarlar onun qəhrəmanlığını unutmayıblar və öldüyü yerə bir xatirə daşı qoyublar. Daş üzərində belə bir cümlə var:
“O, qəhrəman bir düşmən idi, rahat uyusun!”
Robbi Kinin saymazyana açıqlamasına görə macarlara kin bəsləməyə ehtiyac yoxdur. Lakin Qurban Qurbanov və komandası dünən gecə stadionda “qəhrəman düşmən” kimi mübarizə aparmağı bacardı.
Qurban Qurbanov macar komandasının qəhrəman düşməni oldu.
***
– Şıxəli, azərbaycanlısan?
– Yox, metisəm – atam rus, anam ləzgi...
***
Azərbaycanın hansısa güləşçisinin haradasa çempion olmağı da yaxşıdır, bir cüdoçunun hansısa beynəlxalq uğuru da sevindiricidir, şahmatçımızın kimisə mat eləməyi də riqqətləndirir... Amma “Qarabağ”da izaholunmaz başqa bir güc var. Onun sevindirmək dozası həm adındakı doğmalıqla, həm də komanda olaraq xasiyyəti ilə bağlıdır. Qurban Qurbanov o qədər də böyük olmayan imkanlarla, məntiqi, soyuqqanlılığı və peşəkarlığı ilə meydana xalqı sevindirən komanda çıxarmağı bacarıb. Azərbaycanlıların sevinməyə həmişə ehtiyacı olub. Bu ehtiyac son illər “Qarabağ” adı ilə təmin edilir.
Qurban Qurbanov oyundan sonra kanalların birinə müsahibə verəndə səsinin batdığının şahidi oluruq. Oyundan sonra küçəyə çıxırıq, satıcı ilə, taksi sürücüsü ilə, məhəllədəki gözətçi ilə söhbət edirik, görürük hamının səsi Qurbanın səsinə çevrilib, Qurbanın səsinə oxşayır.
“Qarabağ” azərbaycanlıların səsini batırır, sevincdən qışqıranda...
***
– Süz, Şıxəli, süz, “Qarabağ” vuracaq!
– Bilirəm...
Şıxəli müştərinin qədəhinə şərab süzüb hər dəfə Qarabağın vuracağını təsdiqlədikcə oyun bir az da qızışırdı. Nəriman ötürmə edəndə isə hamının ürəyinə su çiləndi.
Sağ ol, “Qarabağ”, süz, Şıxəli!