Hər şey həmin gündən başladı – xalqın seçimi, Azərbaycanın taleyi

Azərbaycan tarixində elə günlər var ki, onlar xalqımızın yaddaşına əbədi həkk olunur. Bu günlərdən biri də 1993-cü il oktyabrın 3-dür. Həmin gün xalqımız öz taleyini, müstəqilliyini və dövlətçiliyini qurtuluş yoluna çıxarmaq üçün tarixi bir qərar verdi.

Sumqayit.tv xəbər verir ki, bu sözləri Milli Məclisin deputatı Səbinə Salmanova deyib.

Deputat bildirib ki, Azərbaycan dövlət müstəqilliyini bərpa etdiyi ilk illərdə ağır sınaqlarla üz-üzə qalmışdı:

“1990-cı illərin əvvəllərində hakimiyyətdə olan AXC-Müsavat cütlüyünün səriştəsizliyi, dövlət idarəçiliyindəki xaos, milli birliyin olmaması ölkəmizi parçalanmaq və məhv olmaq təhlükəsi ilə üz-üzə qoymuşdu. Ermənistanın hərbi təcavüzü isə bu təhlükəni daha da dərinləşdirirdi. Bir tərəfdən siyasi böhran, digər tərəfdən işğalçılıq siyasəti nəticəsində torpaqlarımız ard-arda itirilir, xalqımıza qarşı soyqırımı və etnik təmizləmə siyasəti həyata keçirilirdi. Məhz belə bir məqamda xalqın xilası üçün güclü, müdrik və qətiyyətli liderə ehtiyac vardı. Bu lider Heydər Əliyev idi”.

Onun sözlərinə görə, həmin dövrdə xalqın təkidi ilə hakimiyyətə qayıdan Ulu Öndər Heydər Əliyevin qətiyyəti, zəngin dövlətçilik təcrübəsi və uzaqgörənliyi Azərbaycanı parçalanmaq təhlükəsindən xilas etdi:

“Lakin xalqın inamı daha böyük idi. 1993-cü il oktyabrın 3-də keçirilən ümumxalq seçkilərində Heydər Əliyev böyük səs çoxluğu ilə Azərbaycan Respublikasının Prezidenti seçildi. Bu gün tariximizin qürur səhifəsi kimi xatırlanan həmin gün, əslində, müstəqilliyimizin xilası, dövlətçiliyimizin möhkəmlənməsi və xalqımızın gələcəyə inamının bərpası demək idi.

Heydər Əliyevin Prezident seçilməsi ilə Azərbaycanda sabitlik bərqərar olmağa başladı. Ölkə daxilində vətəndaş müharibəsi təhlükəsi aradan qaldırıldı, dövlətçiliyin əsasları möhkəmləndirildi. İqtisadiyyatı bərpa etmək üçün mühüm addımlar atıldı, beynəlxalq aləmdə Azərbaycanın nüfuzu artdı. Ulu Öndərin uzaqgörən siyasəti nəticəsində 1994-cü ildə imzalanan “Əsrin müqaviləsi” ölkənin iqtisadi inkişafının əsasını qoydu, Azərbaycanın gələcəkdə enerji xəritəsində mühüm yer tutmasını təmin etdi”.

Parlamentari söyləyib ki, Ümummilli Lider Heydər Əliyevin Prezidentliyi həm də milli ideologiyanın bərpası, xalqın öz gücünə inanması demək idi:

“O, müstəqil Azərbaycanın dövlət atributlarını möhkəmləndirdi, ordu quruculuğunu prioritetə çevirdi, milli həmrəylik və birlik ideyalarını gerçəkləşdirdi. Hər addımı ilə xalqın Prezidentinə çevrildi, dövlətçiliyin dayaqlarını möhkəmləndirdi”.

S.Salmanova qeyd edib ki, bugünkü güclü, qüdrətli Azərbaycan Ulu Öndər Heydər Əliyev siyasətinin nəticəsidir:

“Onun müəyyənləşdirdiyi inkişaf xətti bu gün cənab Prezident İlham Əliyev tərəfindən uğurla davam etdirilir. Dövlətimizin başçısı Ulu Öndərin siyasi kursunu yeni dövrün çağırışlarına uyğun şəkildə zənginləşdirərək, ölkəmizi regional güc mərkəzinə, söz sahibinə çevirib. Məhz bu siyasətin davamı olaraq Azərbaycan beynəlxalq müstəvidə nüfuzlu mövqe qazanıb, ordumuz güclənmiş, 2020-ci ildə Vətən müharibəsində tarixi Zəfər əldə edilib.

Tarixi həqiqət odur ki, 3 oktyabr 1993-cü ildə başlanmış böyük yol bu gün cənab İlham Əliyevin müdrik və qətiyyətli liderliyi ilə öz məntiqi zirvəsinə çatıb. Azərbaycan artıq regionda sülhün, sabitliyin və inkişafın təminatçısına çevrilib. 1993-cü il oktyabrın 3-də xalqımız yalnız Prezidentini seçmədi, həm də gələcək nəsillərin işıqlı sabahını müəyyənləşdirdi”.

Tarix: 3-10-2025, 12:17 Oxunub: 16

Bölməyə aid digər xəbərlər

25-11-2024, 10:23 75 yaşlı Sumqayıt: Son 10 ildə reallaşan 75 YENİLİK

21-09-2024, 08:17 14 noyabr 2023-cü il tarixdə 29 yaşı qeyd olunan Şəhidimiz Cavid Mirzəyevin həyat hekayəsi...

15-06-2024, 09:34 Milli Qurtuluş Günü böyük ictimai, siyasi və tarixi əhəmiyyətə malik gündür – ŞƏRH

7-06-2024, 07:51 Sumqayıt: Gözəlliklər şəhəri, möhtəşəm quruculuğun ünvanı

29-05-2024, 09:46 Prezidentlə xanımı xocalılılarla... - Yenilənib

26-05-2024, 09:43 İlham Əliyev əfv Sərəncamı imzaladı

19-05-2024, 11:11 Sumqayıt Heydər Əliyevin arzuladığı şəhərə çevrilib

21-02-2024, 11:35 Xocalı soyqırımı - qan yaddaşımız!

15-02-2024, 13:24 70-lərin kəsişməsində: 70-ci illərdə başlayan Sumqayıt sevgisi, 70 il və 70 yenilik

17-11-2023, 09:48 “Onun fatihəsini verincə...” - Rövnəq Abdullayev