Sumqayıt təhsili yeni zirvədə: Elnurun medal qazandıran əzmi

Sumqayıt təhsili artıq beynəlxalq aləmdə də uğurları ilə diqqət çəkir. Bu uğurların arxasında isə istedadlı və çalışqan şagirdlər dayanır. Burada yetişən gənc zəka sahibləri beynəlxalq arenalarda uğurla çıxış edir, Azərbaycan təhsilinin səviyyəsini yüksək şəkildə nümayiş etdirirlər. Bu istedadlı şagirdlərdən biri də Sumqayıt şəhəri M.Füzuli adına 15 nömrəli tam orta məktəbin 7-ci sinfində təhsil alan Elnur Sadıxovdur.Elnur təkcə dərslərində deyil, eyni zamanda riyaziyyat, məntiq və müxtəlif intellektual yarışlarda da fərqlənən bir şagirddir. O, TIMO, SASMO, Math Challenge, Kopernik, UAMO, STEMCO kimi beynəlxalq olimpiadalarda uğurla iştirak edib, qızıl və gümüş medallara layiq görülüb. Elnurun uğur hekayəsi onun zəhmətinin, ailəsinin və müəllimlərinin dəstəyinin, ən əsası isə özünə olan inamının nəticəsidir.Gəlin, bu gənc istedadın düşüncələri, məqsədləri və uğura aparan yolu ilə yaxından tanış olaq:
– Özünüzü təqdim edin.Mən Sadıxov Elnur İlqar oğlu, 2012-ci il avqustun 7-də anadan olmuşam. Hazırda Sumqayıt şəhər M.Füzuli adına 15 nömrəli tam orta məktəbin 7-ci sinfində təhsil alıram. Araşdırma aparmaq, oxumaq mənim ən sevdiyim məşğuliyyətlərdəndir. Məntiqə və riyaziyyata isə xüsusi marağım var. – Həyatınızda beynəlxalq olimpiadaların rolunu necə qiymətləndirirsiniz?Olimpiadalar mənim həyatımda çox önəmli yer tutur. Anam riyaziyyat müəlliməsidir və daim məni müxtəlif olimpiadalara – Lütfizadə, RFM, beynəlxalq səviyyəli yarışlara – təşviq edirdi. Əvvəllər bu yarışlara qatılmaqdan qorxurdum. Fikirləşirdim ki, uduzsam necə olacaq? Amma anam deyirdi: "Qorxma. Uduzsan nə dəyişir ki? Əsas odur iştirak edəsən, zəif tərəflərini müəyyən edəsən.” O, mənə hər olimpiadadan sonra qalib olsamda, olmasamda ən sevdiyim şeylərlə mükafat verirdi. Bu məni çox həvəsləndirirdi. Zaman keçdikcə artıq qalib gəlmək daha böyük motivasiyaya çevrildi. Mən də özümü Fermat, Kopernik, SASMO, STEM, Kings, Math Challenge, UAMO, TIMO, Brainiacs, STEMCO və s. kimi müxtəlif yarışlarda sınamağa başladım. Bu yarışlarda əldə etdiyim nailiyyətlər, qazandığım sertifikat və medallar mənə ruh yüksəkliyi və özümə inam verir. Artıq imtahanlardan, yarışlardan qorxmuram. Hətta, qalib gəlməsəm belə, bunun utancverici bir şey olmadığını çox yaxşı anlayıram. – Olimpiadaya hazırlıq zamanı nələrə diqqət edirsiniz?Hər olimpiadanın öz formatı və tələbləri olur. Mən də çalışıram ki, həmin tələblərə uyğun hazırlaşım. Dərslərimi də heç vaxt ikinci plana atmıram. Müəllimlərimi çox sevirəm. Xüsusilə coğrafiya, kimya və biologiya fənlərini də maraqla öyrənirəm.Hər gün ən az 4 saat riyaziyyat və məntiq məşğələlərinə vaxt ayırıram. Bu yolda anamın dəstəyi çox böyükdür – həm mənəviyat baxımından, həm də elmi dəstək baxımından. – Bu uğurlarınızla bağlı Təhsil Nazirliyindən dəstək alırsınızmı?Xeyr, Təhsil Nazirliyindən hələlik heç bir dəstək görməmişəm. Amma, mənim üçün əsl dəstək valideynlərimin, xüsusilə anamın, sinif rəhbərimin, məktəb direktorunun və uşaq vaxtı getdiyim bağçadakı müəlliməmin mənə olan inanclarıdır. Hər dəfə məktəbin qapısından girəndə direktorun zarafatla söylədiyi xoş söz belə mənim üçün motivasiyadır. Qohumlarımın "Elnur ağıllıdır, bacaracaq” deməsi mənə daha da çalışmağa güc verir. – Müxtəlif ölkələrin təhsil sistemləri arasında hansını bəyənirsiniz və ölkəmizdə tətbiqini istərdinizmi?Beynəlxalq olimpiadaların formatı və tələbləri əvvəlcədən bəlli olduğu üçün onlara hazırlaşmaq həm rahat, həm də əyləncəlidir. Məsələn, Global Olympic Center-in Math Challenge yarışında mən 96/100 nəticə göstərərək yerli raundda qızıl medal qazandım. Əgər 100/100 olsaydı, Nyu-Yorkda keçiriləcək final raunduna ödənişsiz qatılmaq şansım olacaqdı. Belə yarışların strukturu şəffaf və aydın olduğu üçün onları çox bəyənirəm. – Gələcək planlarınız nədən ibarətdir? Özünüzü harada görürsünüz?Hazırda gələcəklə bağlı konkret planım olmasa da, mühəndislik sahəsi mənə maraqlı gəlir. Düşünürəm ki, istənilən sahədə uğur qazanmaq üçün məcburiyyət deyil, sevgi və maraq olmalıdır. Ailəm və məktəbimdəki mühitdə məni heç nəyə məcbur etmirlər. Bu da mənim ən çox sevdiyim şeydir. İnanıram ki, qarşıda daha böyük uğurlar məni gözləyir. – Sumqayıtda və məktəbinizdə hansı yenilikləri görmək istərdiniz?Sumqayıtda və məktəbimizdə istedadlı şagirdlər çoxdur. Onlara da mənim kimi şərait yaradılsa, daha böyük uğurlar əldə edə bilərlər. Valideynlərimə və mənə inanıb dəstək olan bütün müəllimlərimə təşəkkür edirəm. Onların inamı məni daim daha irəli getməyə sövq edir.- Bizə vaxt ayırdığın üçün təşəkkür edirəm.Sağ olun.

Söhbətləşdi: Elşən Yəhyayev