TƏBİB-in xaricdən gətirdiyi həkimlərin maaşı azaldılıb?

Tibbi Ərazi Bölmələrini İdarəetmə Birliyinin (TƏBİB) xaricdən dəvət etdiyi həkimlərin maaşı azaldılıb.
“Yeniazərbaycanhəyatı” xəbər verir ki, bu iddia ilə bağlı məlumat bir neçə gün öncə Azadmedia.az-da yayımlanıb.
Məlumatda qeyd edilib ki, əvvəlcə xaricdən geri çağırılaraq 5 min manat məvaciblə işə dəvət alan bu tibb mütəxəssisləri sonradan 1200 manat maaşla işləməyə davam ediblər. Həkimlərlə 5 min manat əməkhaqqı müqaviləsinin cəmi 6 ay sürdüyü, sonra maaşların azaldıldığı bildirilir.
Bundan əlavə, onların İcbari Tibbi Sığortadan gələn ödənişləri də aldığı qeyd olunub.
Məsələ ilə bağlı İcbari Tibbi Sığortaya sorğu ünvanladıq. Qurumdan “Qafqazinfo”nun müraciətinə belə cavab verildi: “Xarici ölkədə təhsil almış bəzi həkim-mütəxəssislər “Tibb müəssisələrində ixtisaslı kadr çatışmazlığının aradan qaldırılmasına dair Proqram” çərçivəsində TƏBİB-in tabeliyindəki dövlət tibb müəssisələrində xüsusi şərtlərlə işə qəbul edilir. Tibb müəssisələrində işə qəbul olunan həkim-mütəxəssislərin fəaliyyətinin və iş şəraitinin qiymətləndirilməsi məqsədilə Monitorinq Komissiyası tərəfindən bir həkim-mütəxəssis üçün 6 aylıq əsaslarla müəyyən edilmiş qayda əsasında monitorinq həyata keçirilir.
Hər bir həkim-mütəxəssis Proqram çərçivəsində fəaliyyətinin davam etdirilməsi üçün bu Qaydada nəzərdə tutulmuş göstəricilərə uyğun fəaliyyət göstərməlidir. Bu səbəbdən Proqram çərçivəsində fəaliyyət göstərən həkim-mütəxəssislərin peşəkar fəaliyyəti və şəxsi keyfiyyətləri Komissiya tərəfindən qiymətləndirilir. Peşəkar fəaliyyəti üzrə qiymətləndirilmə zamanı cərrahi, terapevtik, radioloq, anestezioloq-reanimatoloq ixtisasları üzrə həkim mütəxəsssislər tərəfindən icra olunan əməliyyat, pasiyent sayları, xidmət göstərilən pasiyentlərin məmnunluq göstəriciləri və digər fəaliyyətlər monitorinq edilir.
Şəxsi keyfiyyətləri üzrə isə onların sərgilədiyi davranış (öz bilikləri ilə digər əməkdaşlara bölüşməyə hazır olması, tövsiyələri ilə məsləhət verməyə hazır olması və s.), etik qaydalara riayət etməsi, tibb müəssisəsinin nüfuzunun artmasına verdikləri töhfə və digər göstəricilər dəyərləndirilir. Nəzərdə tutulmuş göstəricilərə cavab verməyən həkim-mütəxəssislərə həvəsləndirici əlavələrin verilməsi Proqramın müvafiq bəndinə əsasən dayandırılır”.
İTS-dən, həmçinin bildirilib ki, həkim-mütəxəssis fəaliyyətinin nəticələrinə görə monitorinqdən müvəffəqiyyətlə keçdikdə həvəsləndirici əlavənin ödənilməsi növbəti dövr üçün uzadılır: “Məlumat üçün bildirək ki, sözügedən həkimlərə “Tibbi Ərazi Bölmələrini İdarəetmə Birliyi” publik hüquqi şəxsin tabeliyindəki tibb müəssisələrində çalışan səhiyyə işçilərinin əməyinin ödənilməsi Qaydası”na əsasən aylıq vəzifə maaşı, sabit həvəsləndirici əlavə, işin nəticələrinə görə aylıq həvəsləndirici əlavə (bonus) və qanunvericiliklə nəzərdə tutulmuş digər ödənişlər hesablanır”.

Tarix: 4-04-2025, 13:26 Oxunub: 18

Bölməyə aid digər xəbərlər

25-11-2024, 10:23 75 yaşlı Sumqayıt: Son 10 ildə reallaşan 75 YENİLİK

26-05-2024, 09:43 İlham Əliyev əfv Sərəncamı imzaladı

15-02-2024, 13:24 70-lərin kəsişməsində: 70-ci illərdə başlayan Sumqayıt sevgisi, 70 il və 70 yenilik

29-12-2023, 08:30 Ziya Kazımov və Ülvi Rəşidov məhkəmə zalında həbs edildi

18-12-2021, 16:30 Sumqayıtın şəhər statusu almasnının 72-ci ildönümü qeyd edildi – FOTOLAR

18-12-2021, 16:30 Ümummilli lider Heydər Əliyev Sumqayıtda anıldı – FOTO

25-07-2021, 10:16 Sumqayıtda icbari tibbi sığortaya keçid

18-07-2021, 10:49 Sumqayıtda icbari tibbi sığortaya keçidlə bağlı tibb müəssisələrinə baxış keçirilib

20-06-2021, 10:30 SON İLLƏR SUMQAYIT NECƏ İNKİŞAF ETDİ? - FAKTLAR

8-06-2021, 15:30 ALLAH ŞƏHİDLƏRİMİZƏ RƏHMƏT EYLƏSİN!