“ADU yüksək təşkilatçılığı ilə seçilən tədbir keçirməklə ortaya bir nümunə qoydu”

“Dünən Azərbaycan Dillər Universitetində “Qafqazda azərbaycanlılara qarşı həyata keçirilmiş soyqırımı və deportasiyalar” mövzusunda təşkil edilən geniş məzmunlu mötəbər tədbirə biz də dəvətli idik”.
“Yeniazərbaycanhəyatı” xəbər verir ki, bu fikirləri Qərbi Azərbaycan İcması Nərimanov təşkilatının sədri Təmraz Tağıyev deyib.
Tədbiri giriş sözü ilə açan Universitetin rektoru, akademik Kamal Abdulla bildirib ki, azərbaycanlılara qarşı zaman-zaman soyqırımılar törədilib və bu cinayətlər Azərbaycanda multikultural dəyərlərlə yaşayan, müsəlman dininə məxsus digər azsaylı xalqlardan da yan keçməyib.
Qərbi Azərbaycan İcmasının İdarə Heyətinin sədri, Milli Məclisin deputatı Əziz Ələkbərli çıxışında azərbaycanlıların soyqırımlarına ilk dəfə Ulu Öndər Heydər Əliyev tərəfindən siyasi qiymət verildiyini bildirib. İcma sədri xatırladıb ki, məhz Ümummilli Liderin 1998-ci il martın 26-da imzaladığı Fərmanla 31 Mart Azərbaycanlıların Soyqırımı Günü elan edilib. Sədr vurğulayıb ki, əslində bütün Cənubi Qafqazda, eləcə də Qərbi Azərbaycan ərazisində soydaşlarımıza qarşı etnik təmizləmə siyasəti həyata keçirilib. İcma sədri tədbir iştirakçılarına Qərbi Azərbaycan İcmasının fəaliyyəti ilə bağlı ilə də məlumat verib.
Sonra ADPU-nun prorektoru, Qərbi Azərbaycan İcması İdarə Heyətinin üzvü, professor Mahirə Hüseynova, Qərbi Azərbaycanın Amasiya rayon İcmasının sədri akademik Abel Məhərrəmov, Qərbi Azərbaycan İcması İdarə Heyətinin sədr müavini, millət vəkili Hikmət Babaoğlu, Qərbi Azərbaycan İcması Qadınlar Şurasının sədri, Milli Məclisin deputatı Məlahət İbrahimqızı, ADU-nin təhsildə xarici dillər kafedrasının müdiri, QAİ Qadınlar Şurasının üzvü, dosent Həqiqət Hacıyeva, Almaniyada yaşayan yazar Dr.Orhan Aras və başqaları mövzu ilə bağlı çıxış ediblər.
Rayon təşkilatının sədri olaraq belə bir tədbirdə iştirakdan məmnun qaldığını bildirən Təmraz Tağıyev qeyd edib ki, bu gün böyüməkdə olan gənc nəslə lazım olan dəyərli fikirlərin dəyərli ziyalılar tərəfindən səsləndirilməsi tədbirin əhəmiyyətini və çəkisini bir qədərdə artırmış oldu.
Belə geniş məzmunlu görüşlərin təşkili bütün hallarda ölkə prezidentinin söylədyi “Qərbi Azərbaycanlıların gec-tez öz doğma yurdlarına qayıdacaqlar” fikrinin tezliklə reallaşacağından xəbər verir. Bu tədbirin keçirilməsində də əsas məqsəd Qərbi Azərbaycandan didərgin salınmış soydaşlarımızın ata-baba yurdlarına geri qayıdışına nail olunması istiqamətində elmi, tarixi, həqiqi faktlara söykənən mübarizəyə dəstək olmaqdır.
Təmraz Tağıyev yekun olaraq bildirib ki, Azərbaycan Dillər Universiteti yüksək təşkilatçılığı ilə seçilən bu tədbiri keçirməklə ortaya bir nümunə qoya bildi.