“Ölüm-qalım məsələsini həll etməyə çalışırıq”

“Xəstəxanaya necə gətirilməyimi xatırlamıram, koma vəziyyətində olmuşam. Özümə gələndə isə əlim-ayağım işləmirdi. Uzun müddət məşq elədim, fizioterapiya keçdim, sonra düzəldi. İndi özümü çox yaxşı hiss edirəm...”
Bunu “Qafqazinfo”ya aprel ayında Respublika Neyrocərrahiyyə Xəstəxanasında beyin absesindən əməliyyat olunan 14 yaşlı Məhəmməd Süleymanov deyir. Onun xəstəxanada təxminən 6 saata yaxın sürən ağır əməliyyatı və sonrakı bərpa prosesi bütünlüklə icbari tibbi sığorta hesabına həyata keçirilib. Budəfəki gəlişi isə təkrar müayinəsi ilə bağlıdır.

M. Süleymanovun həkimi, xəstəxananın Təcili Tibbi Yardım şöbəsinin müdiri Rafael Bayramov onu qəbul edib əyani müayinəyə başlayır. O bildirir ki, iki ay ərzində pasiyentin səhhətində xeyli irəliləyiş var, kritik günləri geridə qoyub.
Həkimlə söhbətimizdə məlum olur ki, əksər neyrocərrahiyyə əməliyyatları sözügedən tibb müəssisəsində icbari tibbi sığorta ilə icra olunur. Ən çox müraciətlər isə beyin absesləri, anevrizmalarla bağlıdır: “Əvvəllər külli miqdarda vəsait tələb edən xəstəliklər indi xəstəxanada icbari tibbi sığorta hesabına müalicə və əməliyyat olunur. Bir sıra xəstəliklərin, o cümlədən, baş beyin anevrizmalarının açıq üsulla əməliyyatları, şişlərin cərrahi əməliyyatları, endoskopik transnazal cərrahiyyə əməliyyatları və digərləri sığortaya daxildir.

Ən tez-tez rast gəlinən xəstəliklərdən biri abseslərdir. Xəstələr bizə kobud nevroloji defisit, kəskin baş ağrıları ilə müraciət edirlər. Anevrizma da ən çox rastlanan ağır xəstəliklərdəndir. Çox təəssüf ki, bizə çox hallarda xəstələr qansızma ilə, ağır vəziyyətdə müraciət edirlər. Sözün əsl mənasında, ölüm-qalım məsələsini həll etməyə çalışırıq. Xəstələr uzun zaman reanimasiyada qalmalı olurlar, qansızmadan sonra onların 60-70 faizi normal həyata qayıda bilmir”.
Həkimin sözlərinə görə, bu xəstəliklərin yaranmaması üçün insanların sağlam həyat tərzi keçirmələri şərtdir. Məsələn, anevrizmaların partlamasının birinci səbəbi siqaret və alkoqoldur.
Xəstəxanada ağır beyin cərrahiyyəsi ilə yanaşı, həm də nevroloji müayinələr həyata keçirilir. Həkim-nevroloq Könül Mansirovanın sözlərinə görə, ona daha çox günün ən aktual xəstəlikləri - baş ağrıları, baş gicəllənmələri, yaddaş zəifliyi, yuxu problemləri, onurğa sütunu ağrıları, oturaq şəraitlə əlaqəli olaraq boyun və bel nahiyəsində ağrılar, ətraflarda uyuşmalar, keyimələrlə bağlı müraciətlər olunur.
“Bu hallarda biz xəstələri müayinə edirik, nevroloji defisitin olub-olmadığını müəyyənləşdiririk. Son illər iqlim dəyişiklikləri də nevroloji xəstəliklərin yaranmasında rol oynayır. Xüsusən bu hallarda xəstələr bizə baş ağrıları, təzyiq problemləri ilə müraciət edirlər. Həmçinin telefon və planşetlərdən uzunmüddətli istifadə baş və boyun nahiyəsində ağrılara, yaddaş zəifliyi, diqqət dağınıqlığına səbəb olur”, - deyə həkim bildirib.

Həkim deyir ki, Altsheymer, Parkinson kimi bir sıra ağır nevroloji xəstəliklərin vaxtında aşkar edilməsi üçün müayinələr də sığorta ilə icra edilir.
K. Mansirovanın sözlərinə görə, bu xəstəliklərdən uzaq olmaq üçün sağlam həyat tərzi lazımdır. Həm də burada söhbət təkcə fiziki sağlamlıqdan getməməlidir: “İnsanların düşüncələri, emosiyaları, psixi durumları da sağlam olmalıdır. Bunun üçün düzgün qidalanma, yaxşı yuxu rejimi, fiziki aktivlik olmalıdır. Mənə bu tip problemlərlə müraciət edənlər arasında fiziki aktivliyi az olanlar çoxluq təşkil edir. Müayinə zamanı məlum olur ki, onların nevroloji defisitləri yoxdur, əsas problemləri passiv həyat tərzidir”.

Tarix: 23-08-2024, 13:14 Oxunub: 48

Bölməyə aid digər xəbərlər

18-06-2024, 09:05 Qəbələdən Bakıya helikopterlə təxliyə olundu - Yenilənib - Video

29-05-2024, 09:46 Prezidentlə xanımı xocalılılarla... - Yenilənib

26-05-2024, 09:43 İlham Əliyev əfv Sərəncamı imzaladı

15-02-2024, 13:24 70-lərin kəsişməsində: 70-ci illərdə başlayan Sumqayıt sevgisi, 70 il və 70 yenilik

9-09-2023, 13:25 Hadrutda səngərdə olan zabitdən Ali Baş Komandana təsirli müraciət

19-08-2023, 08:20 Səkinə Sadıqova deyir ki, arxamda TƏBİB dayanıb

23-02-2022, 10:24 İlham Əliyev və Vladimir Putinin birgə mətbuat konfransı TAM MƏTN + VİDEO

25-07-2021, 10:16 Sumqayıtda icbari tibbi sığortaya keçid

18-07-2021, 10:49 Sumqayıtda icbari tibbi sığortaya keçidlə bağlı tibb müəssisələrinə baxış keçirilib

20-06-2021, 10:30 SON İLLƏR SUMQAYIT NECƏ İNKİŞAF ETDİ? - FAKTLAR