Bakıda beynəlxalq konfrans keçirilir - Fotolar - Yenilənib

Bu gün Bakıda İtkin düşmüş şəxslər üzrə Bakı Dialoqu çərçivəsində “İtkin düşmüş şəxslər probleminin həlli üçün səylərin birləşdirilməsi və əməkdaşlığın genişləndirilməsi” mövzusunda beynəlxalq konfrans keçirilir.
“Yeniazərbaycanhəyatı” xəbər verir ki, tədbirdə Əsir və itkin düşmüş, girov götürülmüş vətəndaşlarla əlaqədar Dövlət Komissiyasının sədri, Dövlət Təhlükəsizliyi Xidmətinin rəisi general-polkovnik Əli Nağıyev iştirak edir.
Tədbirdə Türkiyə, Gürcüstan, Xorvatiya, Moldova, Bosniya və Hersoqovina və digər ölkələrdən nümayəndə heyətləri iştirak edir.
***
DTX rəisi bildirib ki, 2025-ci il ərzində Dövlət Komissiyası beynəlxalq təcrübənin öyrənilməsi və xarici tərəfdaşlarla əməkdaşlıq imkanlarının müəyyənləşdirilməsinə də xüsusi diqqət yetirib.
O qeyd edib ki, bu xüsusda 2025-ci ilin mart ayında İtkin düşmüş şəxslər üzrə Beynəlxalq Komissiyanın Baş direktoru xanım Katrin Bomberqerin rəhbərliyi ilə qurumun nümayəndə heyəti ölkəmizə səfəri nümunə göstərilə bilər: “Təmaslar çərçivəsində Beynəlxalq Komissiya ilə çox faydalı müzakirələr aparılmışdır. Sözügedən müzakirələrin nəticəsi olaraq Beynəlxalq Komissiya tərəfindən hazırlanmış elektron məlumat bazasının təmənnasız qaydada Azərbaycana təqdim edilməsi, itkin düşmüş şəxslər probleminin həllində, xüsusilə itkin düşmüş şəxslərə aid məzar yerlərinin axtarışı, qazıntı, ekshumasiya və eyniləşdirmə, o cümlədən aidiyyəti qurumların mütəxəssis heyətinə təlimlərin keçirilməsi, yeni texnologiyalar və metodologiyaların tətbiqi sahəsində ölkəmizə dəstək veriləcəyi və əməkdaşlığın davam etdiriləcəyi bildirilib. Beləliklə, 2025-ci il üzrə “İş planı” təqdim olunub”.
Ə. Nağıyevəlavə edib ki, Bosniya və Hersoqovinanın İtkin düşmüş şəxslər İnstitutu ilə ikitərəfli əməkdaşlıq istiqamətlərinin müəyyənləşdirilməsi, itkin düşmüş şəxslərin taleyinin aydınlaşdırılması sahəsində səmərəli olacağını nəzərə alaraq, qarşılıqlı əməkdaşlıq haqqında Memorandum layihəsinin müzakirəsi ilə əlaqədar 2025-ci ilin aprel ayında Dövlət Komissiyasının nümayəndə heyəti Sarayevo şəhərinə səfər edib. Səfər zamanı anlaşma Memorandumunun layihəsi müzakirə edilib və razılaşdırılıb. Bu gün həmin Memorandum imzalayacaq.
“İtkin düşmüş şəxslər probleminin həlli üçün səylərin birləşdirilməsi və əməkdaşlığın genişləndirilməsi” mövzusunda beynəlxalq konfransda Memorandum imzalanıb.
Anlaşma Memorandumu Azərbaycanın Əsir və itkin düşmüş, girov götürülmuş vətəndaşlarla əlaqədar Dövlət Komissiyası və Bosniya və Herseqovinanın İtkin Düşmüş Şəxslər İnstitutu arasında imzalanıb.
İmzalanma mərasimi qapalı keçirilib.
***
Birləşmiş Krallığın Xarici İşlər Ofisində sabiq nazir Rəhman Çişti təklif edib ki, Avropa İttifaqında da itkin düşən şəxslərlə bağlı vahid təşkilat yaradılsın.
O bu təşkilatın hansı formada fəaliyyət göstərməsi məsələsinə də toxunub. Bildirib ki, İtkin düşmüş şəxslər üzrə Beynəlxalq Komissiya bu baxımdan mühüm addımlar atır.
“Azərbaycana bu konfransın təşkilinə görə çox təşəkkür edirəm. Hesab edirəm ki, bu konfranslardan çıxış edərək tədbir görmək lazımdır. Ölkələrin itkin düşmüş şəxslərlə bağlı ayrıca nümayəndəlikləri yaradılmalıdır. Çünki statistikaya baxsaq, dünyada hər gün itkin düşən şəxslərin sayı artır”.