ABŞ Dövlət Departamenti Ermənistan hökumətinə korrupsiya ilə mübarizə aparmaqda yardım edəcək mütəxəssis təyin etmək niyyətindədir. O, Ermənistanın Ədliyyə Nazirliyi ilə əməkdaşlıq edəcək və islahlatların həyata keçirilməsinə kömək göstərəcək.
Bu barədə RT nəşri ABŞ Dövlət Departamentinin müvafiq sənədinə istinadla xəbər yayıb.
“Məsləhətçi Ermənistan hökumətinə yeni korrupsiya əleyhinə orqanların yaradılması və onların effektivliyinin artırılmasında (o cümlədən, formalaşdırılma mərhələsində olan Ermənistanın Antikorrupsiya Komitəsinə) dəstək verəcək. Bu qurumlar korrupsiya hallarını araşdıracaq və korrupsionerləri məsuliyyətə cəlb edəcək”, - sənəddə deyilir.
Bununla yanaşı, mütəxəssis Ermənistan hökumətinə hüquq-mühafizə sistemində islahatların hazırlanması və reallaşdırılması ilə bağlı tövsiyələr verəcək.
“Hazırlıq, təlim aparacaq, həmçinin Ədliyyə Nazirliyinə, Ermənistan Antikorrupsiya Komitəsinə (yaradıldıqdan sonra) və digər müvafiq orqanlara korrupsiya ilə mübarizəyə böyük diqqət ayırmaqla geniş məsələlər spektrində digər texniki dəstəkləri təmin edəcək”, - deyə Dövlət Departamentindən bildirilib.
Məsləhətçi, həmçinin, təlim səfərlərinin, treninqlərin təşkili ilə də məşğul olacaq.
Qurumdan bildirilib ki, sözügedən vəzifəyə yalnız ABŞ vətəndaşları namizəd ola bilər.